Su bisu de Leo Messi, de sa Natzionali argentina e de unu populu intreu est realtadi. Trintases annus a pustis Diego Armando Maradona, is argentinus torrant a essiri campionis de su mundu de fubalu a s’acabu de una partida spantosa, comenti de diora non si ndi biant, forsis sa prus bella finali de sempiri de is Mondialis.
Messi a s’acabbu de sa vitoria chi aspetaiat de una vida narat ca ancora non est lompiu su tempus de lassai sa Natzionali: “Bogliu giogai calencun’atra partida in Natzionali de Campioni de su Mundu”.
“Sa Copa de su Mundu est cussu chi mi mancaiat. Immoi est innoi – is fueddus de Messi –. Serra isa carriera in custa manera, poita de seguru funt is urtimus annus chi giogu, est un’ammaju. Eus sunfriu meda ma ce dda eus fata. Mi pragit abarrai in Natzionali, bogliu sighiri poita sa truma est de amigus e grandus giogadoris”.
Un’atru protagonista chi tenit meritus mannus est Emiliano “Dibu” Martinez, su portieri chi ancora est stetiu determinanti in is tirus de is undixi metrus e non feti: “Est stetia una partida de suferentzia manna, ddu sciaus: non ce dda eus fata a controllai sa partida comenti depiaus, candu fustis bincendu 2-0 e mancaiant feti dexi minutus a sa fini. Ma po diventai campioni de su mundu tocat a sunfriri. Candu seus andaus a is rigoris a is cumpangius mius apu nau de abarrai trancuillus ca calencunu ddu iari aciapau”.
Su Comissariu tecnicu Lionel Scaloni at umperau custus fueddus: “A pustis criticas medas, immoi nosi depeus gosai finas in fundu sa vitoria. Nosi dda eus meritada, sa truma de giogadoris est stetia una cosa de non creiri”.
De sa parti de is francesus ddu est sa delusioni e su ct Deschamps non ddu mandat a nai: “Teneus cosas medas de nai. Chi iaus pigau su gol de su 3-0 non ddue fut nudda de nai, non eus fatui s cosas beni po un’ora e passa. In segus, cun coragiu, barra, calidadi et energia eus postu s’Argentina in dificultadi manna. Candu tocaus sa Copa de su Mundu e non ce dda feus a dda pigai est ancora prus dificili a ce dda calai. Ma su fubalu est aici e ddu depeus acetai”.
Màuru Mura
Martis, su 20 de Mesi de Idas de su 2022
Foto:https://www.corrieredellosport.it/news/calcio/mondiali-2022/argentina/2022/12/19-101326554/mondiali_festa_nelle_marche_per_l_argentina_e_la_terra_dei_trisavoli_di_messi
