Sighint a chistionai su Casteddu e s’Empoli: massimamenti po cantu pertocat su passagiu de s’allenadori Davidi Nicola in Sardigna. Ma is s’acordiu iat podit imbucai finas Marin, giogadori de mesu campu de propriedadi de su Casteddu chi at giogau in is urtimus dus annus in Toscana. Po s’ora totu in bucas funt cosias, ma Nereo Bonato, su diretori casteddaiu, coidendu at a chistionai cun is giornalistas po amostai a eita puntu est sa situatzioni. De seguru non c’at essi s’ufficialidadi, finas chi is giogus parint fatus, poita ancora non totu est decidiu. S’at a chistionai prus che a totu de dinari: cantu serbit po libbertai Nicola de s’Empoli?
Su Casteddu iat a bolli serrai totu coidendu, ma in custu giogu de is partis depit ascurtai a innantis s’Empoli chi de sa sua tenit unu paperi de acordiu cun Nicola finas a ocannu chi benit. Ma, est de nai, ca sa sociedadi toscana puru no est chi dda possat tirai po is longas poita depit cicai unatru allenadori. Su diretori est unu nou, Robertu Gemmi e si chistionat de Eusebiu Di Francesco po sa panchina de su campionau benienti.
Po cussu chi si narat, su matessi Nicola iat airi giai chistionau cun Bonato po is primus nominis: unu est de seguru Pitanu Luperto. Ma custu nomini est acapiau finas a cussu chi at a fairi Mina e finas s’atru giogadori de difesa Andria Dossena, chi pragit meda a sa Fiorentina. Po cantu pertocat is giogadoris de a innanti po s’ora si scit feti ca Oristanio e Shomudorov iant depiri torrai a s’Inter e a sa Roma, comenti finas Gaetano est torrau a su Napoli, ma si chistionat giai de unu interessu de su Casteddu, ma ant essi Conte, allenadori nou de su Napoli, e su matessi Nicola a decidiri su distinu de su piciocu. Un’atru nomini chi est suta atentzioni est cussu de Veroli, donau ocannu passau de su Casteddu a su Catanzaro. A intru de cras su Catanzaro ddu podit riscatai, ma su fueddu urtimu at essi de su Casteddu.
Màuru Mura
Giobia, su trexi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.avvenire.it/agora/pagine/nicola-luomo-delle-sfide-impossibili
