Est sa Spagna a binciri is Europeus de fubalu de su 2024. Non podiat essiri diversamenti ca sa scuadra de De la Fuentes at amostau su giogu meglius e at bintu, comenti non fut mai sussediu in is contus de custa manifestada, dogna partida giogada. Giai partendu de sa prima filera at postu unua in palas de s’atra sa Croatzia, po 3-0, s’Italia, po 1-0, s’Albania cun su matessi 1-0, fendu giogai is riservas ca fut giai cualificada cun su primu postu in buciaca. In segus a is otavus at acracangiau sa Georgia cun d’unu 4-1 chi non lassat peruna duda e dapoi in is cuartus sa Germania po 2-1: finas chi in custa partida ddu at un’umbra manna po unu rigori non donau a is tedescus. Peruna umbra in sa partida cun sa Francia binta po 2-1 e eris a merì in Berlino no at sunfriu meda cun s’Inghilterra bincendu po 2-1, finas chi su gol de sa vitoria de Oyarzabal est lompiu candu sa partida fut acabbendu.
A innantis, a pusti una parti de unu chi no iat spantau e cun is portieris de s’una e de s’atra scuadra chi non ant fatu mancu una parada, sa Spagna est partia a forti e dapoi de unu minutu e mesu est passada in vantagiu cun dd’unu grandu bellu gol de Nico Williams. Chi s’Inghilterra, in cussu mentris, no est afundada depit donai miniscimentu mannu a su portieri Pickford: difatis prus de una borta at permitiu a is cumpangius sus de abarrai in partida. Candu funt imbucaus, po sa scuadra de Southgate, Watkins e Palmer sa partida est mudada e difatis su matessi giogadori de s’Arsenal at agatau su paregiu cun dd’unu tiru de foras de area. Sa Spagna ca iat perdiu Rodri, su giogadori meglius de totu s’Europeu, non s’est arrendia e candu sa partida pariat depessit sighiri cun is tempus suplementaris at agatau su gol chi dda ponit in is pumus prus artus de s’Europa de fubalu cun Oyarzabal, chi fut imbucau a su postu de Morata.
Màuru Mura
Lunis, su cuindixi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.repubblica.it/sport/calcio/esteri/2024/07/14/news/spagna_inghilterra_gol-423395164/
