Sa violentzia politiga in is Stadus Unidus at boddiu prus de una bia chini fut presidenti a innantis de Donald Trump. Cuatru de is corantases presidentis funt stetius bocius: su de unu Abramo Lincoln in su 1865, in segus James Garfield in su 1981, sighiu de William McKinley in su 1901. Ma cussu chi at moviu prus is americanus est de seguru cussu de John Kennedy su 22 de Sant’Andria de su 1963, in su mentris chi s’agataiat in sa machina in Dallas. Una morti chi nd’iat sturau is speras de unu mundu de mudai chi, dapoi, est diventau unu misteriu chena acabbu: su bocidorgiu cun prus indagus in su seculu passau, aunia ancora non si cumprendit beni, ma cun s’acabbu uficiali ca a bociri Kennedy fut stetiu feti Lee Harvey Oswald.
Cinc’annus a pustis sa morti de John Kennedy, su cincu de làmpadas de su 1968, fut tocau finas a su fradi Robert, in su Ambassador Hotel de Los Angeles, in su mentris de sa campagna eletorali. A ddu bociri, lassendu atrus cincu personis lantiadas, Sirhan Sirhan, piciocu de binticuatr’annus pallestinesu chi iat umperau una pistola.
Su trinta de martzu de su 1981, a pustis dus mesis, o pagu prus, de essiri diventau presidenti est stetia sa borta de Ronald Reagan: fut lassendu s’Hilton Hotel in Washington, aunia iat fueddau cun cincumila delegaus de su Sindacau Afl-Cio, candu unu macu, John Hinckley Jr, ddu at sparau, boddendudeddu a unu prumoni, ma chena ddu bociri. Finas su giornalista James Brady, s’agenti de su Secret Service Timothy McCartthy e su politziotu Thomas Delahanty iant tentu dannus. Reagan non si ndi fut acatau inderetura de ndi essiri boddiu e feti candu iat cumentzau a tussiri sanguni fut stetiu portau a su George Washington University Hospital.
Atrus presidentis americanus a airi erriscau po unu pilu de essiri bocius funt Franklin Delano Roosevelt, Harry Truman, Theodore Roosevelt e Gerald Ford.
Màuru Mura
Dominigu, su catodigi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sito/notizie/mondo/2024/07/14/le-falle-della-sicurezza-per-lattentato-a-trump-bufera-sul-secret-service_9f25b1aa-42e6-4aa8-8066-e4c92f069b76.html
