Dì de doxi de sa guerra in su Orienti de mesu, a sighiri de s’atacu de su bintontu de friargiu de is Stadus Unidus e de Israele contras de s’Iran. A pustis is fueddus, in cuntrastu, in pissu de s’acabbu de sa guerra, cun su presidenti americanu Donald Trump chi narat ca at a lompiri coidendu e su presidenti de Israele Benjamin Netanyahu chi narat s’imbessi, in sa zona de su Gulfu s’est bivia una noti de lancius de missilis e sciopamentu de is dronis.
S’Iran, invecias, at fatu sciri de airi atacau meda contras de is obietivus de is Stadus Unidus e de Israele: unu centru de comunicatzionis satellitaris in Haifa, basis de sordaus in Israele e obietivus sempiri de is americanus in atras partis de s’Orienti de mesu, intru de custus su Kurdistan de s’Iraq e sa basi navali de sa “Quinta Flotta” americana in su Bahein.
Sa nova dd’at cunfirmada finas s’esercitu israilianu, chi at nau de airi rivelau atrus missilis contras de sa Natzioni, partius de s’Iran e de airi postu in moru is difesas aereas, in su mentris chi fut in cursu un’atacu, de su matessi Israele, contras de s’Iran e de su Libanu. “Sa filera de difesa est in motu po cicai de frimai s’amelessu iranianu”, at nau s’esercitu in su profilu de Telegram. Is sirenas ant sonau in Gerusaleme e sonus fortis de esplosionis si funt intendias a tesu. De custu si scit ca “unu numuru piticu de genti funt abarradas lantiadas in su mentris chi andaiant in is zonas de protetzioni”.
Allarmi mannu finas in s’Arabia Saudita: su ministeru de sa difesa at fatu sciri ca is difesas militaris de sa Natzioni ant frimau e abbatiu dus dronis chi depiant sciopai unu giacimentu de petroliu. Est a nai cussu de Shaybah, in sa parti orientali de s’Arabia. Est finas de nai ca custu giacimentu, mannu de averas, postu in is orus de sa làcana cun is Emiratus arabus unidus, est giai stetiu postu suta atentzioni de s’Iran de su cumentzu de sa guerra.
