Eris, biora de is duas de pusti prangiu, ant agatau is orrestus de Francisca Deidda, sa picioca chi biviat paris a su pobiddu in Santu Sparau de su 2012, ma cun arreiginis de Assemini, sparessia de sa metadi de su mesi de maju passau. Funt, a intru de unu borsoni, in is orus de su ponti romanu in s’Orientali becia, in su sartu de Santu Idu, acostau de su caminu, in sa parti de s’Erriu Picocca. Sa matessi zona aunia in is dis passadas is cicadoris iant agatau unu “bite” po is dentis e is orrestus de una felpa cun arrastas de sanguni. Miniscimentu mannu po dd’airi agatada tocat a ddu donai, massimamenti, a is canis molecolaris, lompius in is dis passadas de Bologna.
Oi is orrestus de sa femina ant essi a disponimentu de su dotori Robertu Demurtas, chi giai eris est erribau in su logu de s’agatamentu, po s’autopsia chi at a depiri donai arrespustas po comenti est morta Francisca. O, po sa giustissia, po comenti est stetia bocia. Paris a su dotori funt lompius inderetura su publicu ministeru Marcu Cocco, su capu de is carabineris de Iglesias, su magiori Fabiu Alfieri, su capu de sa Cumpangia de Santu Idu, Massimu Meloni e su capu de su repartu operativu de sa provincia Danieli Credidio.
Andria Deidda, su fradi de Francisca, non s’est amostau, ca de seguru su dolu fut mannu meda. Po issu at chistionau s’abogau Giuannifrancu Piscitelli chi est lompiu in Santu Pilimu: “Soi innoi comenti de abogau de Andria, m’at nau de benni deu e aici apu fatu. Apu bidu totu e mi dispragit meda”.
In su mentris, eris in su presoni de Uta sa giustissia at intendiu un’atra borta su pobiddu de Francisca, Igor Solla, incurpau de dd’airi bocia e atacau su corpus: a pustis calencuna ora est acabbau. De cantu si narat iat airi nau ancora de non tenni peruna responsabilidadi. Immoi sa giustissia, po sa lei, facat su caminu chi depit.
A sa familia e a totu sa geni chi boliat beni a Francisca lompant is passientzia mannas de totu su populu sardu.
Màuru Mura
Cenarba, su dixiannoi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://notizie.virgilio.it/francesca-deidda-cadavere-trovato-dopo-due-mesi-nella-zona-di-san-vito-il-marito-igor-sollai-nega-l-omicidio-1630013
