Non si connoscit galu sa dì e mancu su mesi, ma s’atobiu tra is partidus de su cetrudrestra, chi guvernant sa Regioni Sarda, giai s’at a fairi ma non po immoi. Senadoris e deputaus sardus funt trabbagliendu in Roma po fairi nasciri su guvernu nou e non podint presentziai: duncas est meglius a aspetai unu pagheddu. Acrariu finas su problema po s’atobiu cun is sindigus de su presidenti de sa Regioni Christian Solinas, chi s’atra dì at fatu morrungiai calencunu.
A nai sa beridadi, prus che una chistioni politiga, parit chi s’atobiu siat sartau po mori de su logu scioberau: sa strutura religiosa, scioberada po s’atobiu, non podiat ospitai prus de 250 personis totu paris.
Sa chistioni s’est coloroda de grogu cun calencuna polemica puru. De una “chat”, chi depiat abarrai segreta, sunt bessius a foras messagius chi nono funt serbius po calmai, ma po ponni fogu: “Sa pensada fut cussa de un’atobiu pitichu, chi iat airi donau unu messagiu de unu trabagliu fatu de totus po is chistionis prus de importu de immoi finas a s’acabbu de sa legisladura. Po cussu apu cicau de non si atobiai in logus comenti albergus. Castiendumì in giru apu bidu ca sa sola chi podiat donai sa seguresa fut sa strutura religiosa de Bultei”.
S’arrespusta non s’est fata aspetai: “Arregioni, chi fut a nos atobiai crochendu inigui ddue depiant essiri finas is sindigus”. E galu ancora: “Is sindigus funt centusessanta, ddus ia bolli atobiai su lunis a pustis o in sa Fiera de Casteddu o, a dogna manera, in d’unu logu chi ddis permitat de abarrai comudus”.
Fradis d’Italia est crara e aciungit ca “chena is sindigus non at a partecipai a s’atobiu. Non si podint ponni is sindigus nostus a suta de is atrus politigus”.
Sa chat acabat cun is fueddus de Solinas: “Nemus at nau ca is sindigus ci depant essiri. Soi stetiu deu a pediri s’atobiu intru de nosu e a chistionai cun is sindigus. Innoi est fueddendusì de problemas de logistica…”.
Màuru Mura
Lunis, su 17 de mesi de ladamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.regione.sardegna.it/j/v/2568?s=344398&v=2&c=199&t=1
