Digeria sa delusioni manna de Bologna, candu pariat ca sa partida si fut ponendu beni, cun d’unu paregiu, a innantis chi Fabbian essit fatu su gol chi at donau is tres puntus a is piciocus de Motta, is giogadoris de su Casteddu funt giai cumentzendu a pensai a sa partida chi at a lompiri. Ancora duas cidas ca su campionau dominigu si frimat po is partidas de sa Natzionali de Spalletti. Su Casteddu dominigu dixiaseti si dd’ant a biri cun s’Udinese de Sottil, in sa Domus Arena a mesud’ e mesu.
Mercuris, cras ses de cabudanni, torrant a cumentzai cun is allenamentus. No ant essi in medas ca ant a mancai is giogadoris chi funt cun is natzionalis e cussus chi non istant beni meda. A dogna modu cras in Asseminello s’ant a torrai a biri.
Arriolat sa sistuatzioni de is atacantis: Pavoletti ancora depit curai de su problema chi at tentu, e ddu at fatu bessiri de su campu, in sa partida cun s’Inter chi dd’at custrintu a sartai sa partida in Emilia; Lapadula mancu a ndi chistionai ca est ancora trabagliendu e a innantis de su mesi de Sant’Andria non at a torrai a giogai. De biri is cunditzionis fisicas de Petagna, frimau de unu infortuniu a sa camba dominigu passau. Shomudurov cun Luvumbo, invecias, funt cun is natzionalis insoru, aici comentti Oristanio, chi est paris a Prati, cun sa natzionali de is giovunus a suta de is bintun’annus.
Mercuris Ranieri at essi finas chena Radunovic, Chatzidiakos, Wieteska, Makoumbou e Obert. E chi s’atacu prangit sa difesa no est chi possat erriri meda: in Casteddu abarrant feti Goldaniga, Capradossi e Dossena. Finas Nandez iat a podiri lassai s’Isula e erriciri in custas oras sa telefonada de su CT Bielsa po torrai in Natzionali.
Ma non est totu mali, ca sa frimada de su campionau iat a podiri de importu po fairi torrai beni a Mancosu.
Sa partida cun s’Udinese est de importu po cicai de torrai a ponni beni sa classifica e po arregalai spera a is tifosus: tres partidas funt tropu pagus po fairi unu bilanciu, ma su Casteddu s’agatat giai in abbas malas, unu puntu paris a sa Roma, e cun feti s’Empoli chi sighit.
Est a nai ca in su primu annu de Serie A de Ranieri, in su noranta, is primas tres partidas funt andadas meglius cun d’una vitoria in Napoli e duas partidas perdias cun Inter e Atalanta.
Màuru Mura
Martis, su cuatru de cabudanni de su 2023
Foto: https://www.eurosport.it/calcio/serie-a/2023-2024/serie-a-bologna-cagliari-2-1-prima-vittoria-in-stagione-per-la-squadra-di-thiago-motta_sto9777004/story.shtml
