“Is baulus de Bergamo de is mortus de Covid funt comenti su lagu de sa Duchessa in su secuestru de Aldo Moro”. Custus is fueddus in d’unu “tweet”, scritu e a pustis liau, de Tomasu Montesano, figliu de s’atori Erricu e giornalista de su giornali “Libero”.

Po chini non ddu scit, candu Moro fut presoneri de is BR in su 1978, fut erribau unu documentu, fartzu, chi naraiat ca su cropus de su presidenti de sa Democratzia Cristiana s’agataiat in is abbas de sa Duchessa. A pustis dis de cica si fut cumprendiu ca fut feti una manera de fairi perdiri tempus e fairi indagus in atras partis.

Giai in tempus passau Montesano iat nau de non creiri a is mortus de Covid, ma non fut de acordiu po donai custu titulu finas a su babbu, chi est cunvintu invecias de nonj fairi su vacinu e contras su Green Pass.

Inderetura at morrungiau su giornali Libero, aunia Montesano est giornalista e s’ocupat de politiga. Su diretori Alisandru Sallusti at pregontau a s’editori chi ddue siat possibilidadi de ddu licentziai, nendu ca “is fueddus de Montesano funt fartzus e ofendint su giornali e sa redatzioni”.

Finas su Comitau de sa redatzioni si ponit a un’ala e si fait intendiri cun d’una nota: “Nosi poneus a un’ala de is fueddus de su collega chi ponit in relata is fotografias de is baulus de Bergamo cun su Covid. Pedeus scusa a totu is familias chi ant perdiu genti meda. Si podint tenni pensadas diversas in pissu de is vacinus e de su Green Pass, ma non si podint ponni in duda certas cosas chi funt atesu de is valoris de is giornalistas de Libero”.

Preguntas de ci ddu bogai de s’elencu de is giornalistas funt erribadas de sa politiga e su sindigu de Bergamu Gori at fatu sciri ca ddu at a denuntziai.

Montesano s’est difediu nenduru ca “totus ant cumprendiu agliu po cipudda”. “Deu apu fatu feti unu paragoni – at nau su giornalista – ma non bolia nai ca sa cussu chi est sussediu fut fartzu”.

 

 

10 de friargiu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.tgcom24.mediaset.it/cronaca/tweet-sulle-bare-di-bergamo-bufera-sul-giornalista-montesano_45589462-202202k.shtml