S’avertimentu de Vladimir Putin po Prigozhin e is sordaus lompit de sa televisioni, in d’una fueddada a totu sa natzioni, a pustis duas dis de airi provau de nde ddu fairi calai de su poderi. Est ancora totu de acrariri su contu.
In su mentris oi funt cumentzaus is preparativus po passai is armas de Wagner a is trumas russas, fait sciri su ministru de sa Difesa de Mosca.
“Su perigulu est passau, is ribellis non ce dd’ant fata a segai in dus sa Russia. Est faddiu totu cussu chi teniant in conca e sa natzioni nosta est stetia sarvada de is sordaus e de chini tenit sa seguresa in manus”.
Una fueddada, cussa de Putin, de prus o mancu cincu minutus, comenti cussu de sabudu a mengianu aunia su presidenti denuntziaiat sa traitoria de is sordaus de sa Wagner chi funt marcendu bia Mosca, a innantis de si frimai, sonumancu uficialmenti, a un’acordiu postu in peis de su presidenti de sa Bielorussia Alexander Lukashenko.
“Ce dda eus fata a nono spargiri sanguni, sa rebellia dda ias airi binta chena duda, ma deu no apu donau su cumandu de sparai”, at aciuntu Putin. Po s’avertimentu chi est finas una cuncessioni a is sordaus de sa Wagner: “Podint andai in Bielorussia, chena si dda biri cun is tribunalis o si podint ponni a is cumandus de su ministeru de sa Difesa”. Cussu de Serghi Shoigu, su nemigu prus mannud de Prigozhin, chi propriu contras su ministru de sa Difesa e su Capu de Stadu Mannu si dd’at pigada cun fortza po is videus amostaus in Telegram in is urtimas cidas, a innanti de atacai, depiu propiu a su fatu chi sa Wagner de su primu de su mesi de Orgiolas depiat intrai a fairi parti de s’esercitu russu.
Putin in cincu minutus no at mai nomenau su capu de is sordaus Yevgeny Prigozhin. “Is nazistas nous boliant chi is sordaus russus bocessint atrus russu, chi sa sociedadi nosta si seghessit, bocendu. Invecias totu is militaris nostus, cun s’agiudu de is servitzius specialis ci funt arrennescius a poderai sa fidi in su Stadu insoru. Ant sarvau sa Russia de sa distrutzioni”.
Màuru Mura
Martis, su bintiseti de làmmpadas de su 2023
Foto: https://www.editorialedomani.it/fatti/putin-parla-alla-nazione-e-gli-telefonano-gli-emirati-jbfqm539
