Est unu problema italianu, ma massimamenti sardu: non si faint prus figlius. Ocannu passau est stetiu de disisperu: su numuru de pipius po dogna femina est scliscinau a su 0,9 in Sardigna, aici comenti su numuru natzionali, frimu a s’1,20 e acanta a su numuru prus basciu mai connotu, 1,19, de su 1995.
Chena unu mudamentu, e abarrendu aici is cosas, in su 2061 sa Sardigna at a calai a suta de unu milioni de abitantis, chi ant a calai a 739 mila in su 2080. Est a nai ca su distinu de sa Sardigna est a sparessiri, ma non a innantis de essiri diventaus sempiri prus becius: in su 2050 sa genti chi at a tenni prus de sessantacinc’annus at essi su 40% de totu su paris e is giovanus ant’essi comenti is panda.
“Sa Sardigna sighit a essiri sa regioni cun prus pagus pipius po dogna femina po su cuartu annu de sighiu: in su 2023 est a 0,91 figlius e s’annu a innantis fut a 0,95”, scriit s’Istat in s’urtima cica in pissu de sa demografia.
In is urtimus dex’annus in s’Isula funt sparessius centumila abitantis, e po custu est calada a tenni a suta de su miliioni e 600mila a su cali fustis abituaus. Esta a nai ca de su 2014 est comenti chi siant sparessias duas citadis comenti de Terranoa e Salighera.
“No est una cosa noa poita de dex’annus a-i cust’ala su numuru de figlius po dogna femina est sempiri su peus chi s’agatat in totu Italia. Est finas a nai ca calencuna suta regioni ddu sunfrit ancora de prus comenti in s’Aristanesu”, narat sa sabienti de demografia Luisa Salaris, chi intru de is arregionis non chistionat prus de su trabbagliu pagu e de sa seguresa de su trabbagliu etotu, ma ddue ponit finas de feminas e ominis chi non podint coigliai e de arregionis de is feminas chi funt sempiri de prus in cica de fairi carriera in is artis.
E, infinis, a arriolai est sa chistioni de su spopolamentu: in Semestene e Sennariolo cuasi dua domus intru de tres funt sbuidas. In Tzave, Bidoniu e Ussassa su bivimentu de is domus non lompit a su 40%
Màuru Mura
Giobia, su dixiannoi de cabidanni de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.neodemos.info/2024/03/05/la-crisi-demografica-della-sardegna/
