In s’atobiu de eriseru de sa Lega de sa Serie A est lompiu s’acordiu intru de sa matessi Lega cun Dazn e Sky po is diritus de sa televisioni. Sa Lega at acetau su dinari postu a curriri de is duas televisionis cun dixiaseti sociedadis chi ant nau ca giai e tres ca no. Bastaiant catodixi giai po s’acordiu. Su Napoli non s’est amostau ca De Laurentis est contrariu a-i cust’acordiu e a pustis a finas fatu sciri sa pensada sua. Su no dd’at nau finas is sociedadis de su Casteddu e de sa Salernitana.
S’urtima ghetadura posta in su pratu de Dazn e Sky po amostai is dexi partidas de dogna fini de cida de su campionau de Serie A est de noixentus milionis po dogna annu po cinc’annus, de su 2024/25 finas a su 2028/29, cun s’aciunta de atru dinari chi iat podiri aumentai, in teoria, su godangiu de is sociedadis . Dazn at a pagai setixentus milionis a s’annu, Sky is atrus duxentus e si sighit cun sa strutura chi giai funtzionat ocannu: Dazn trasmitit totu is dexi partidas cun tres de custas chi ant essi trasmitias finas de Sky.
Orruit, duncas, sa pensada de unu canali de sa Lega, e bessit de sa scena finas Mediaset chi pensaiat de si pigai sa partida de su sabudu a merì po dd’amostai in craru. Dazn cun Sky ant pagua unu pagu de mancu de su dinari chi iant donau po is tres annus chi andaiant de su 2021 a su 2024. Tandu iant postu in su pratu noixentus bintiseti milionis po dogn’annu.
“Est una sconfita po totu su fubalu italianu, acetendu custu dinari su fubalu italianu at a morri. Sky cun Dazn non cumprendint nudda, non faint su beni de su fubalu nostu”, funt is fueddus tostaus de su presidenti de su Napoli Aureliu De Laurentis, chi aici at frimau s’atobiu cun is giornalistas de s’aministradori delegau de sa Lega de Serie A Luisu De Siervo.
Màuru Mura
Mercuris, su 25 de Santu Gaine de su 2023
Foto: https://youmark.it/ym-interactive/accordo-sky-e-dazn-dall8-agosto-lapp-di-dazn-arriva-su-sky-q-gli-abbonati-sky-potranno-aderire-a-una-specifica-offerta-commerciale-che-include-7-partite-per-turno-di-serie-a/
