Ardu Salaris, su coordinadori de su partidu pesau de Massimu Fantola, at scritu a is capus de is partidus de sa coalitzioni. Destinatarius: Mateu Salvini de sa Lega, Giorgia Meloni de Fradis de Italia, Antoni Tajani de Fortza Italia e Mauritziu Lupi de Nois moderaus. In pagus fueddus in sa litara ddu est scritu ca su nomini de su prossimu candidau a presidenti po su centrudrestra depit passai po sa Sardigna. Po is Riformadoris si chistionat de unu scioberu “totu sardu, de fairi in Sardigna e de is sardus, ca connoscint beni problemas e problematicas de s’Isula”.
Salaris scriit sa decisioni depit tenni contu “de sa situatzioni politica particolari, chi non podit non essiri castiada. Sa Sardigna, comenti beni scieis tenidi una variedadi de movimentus e partidus regionalis de importu mannu chi non tenint unu rapresentanti natzionali, ma chi, fortis de is arreiginis in su territoriu chi tenit pagus egualis in atras regionis de s’Italia, funt una parti de importu de fundamentu in sa coalitzioni. Intru de custus, is Riformadoris Sardus non funt feti “socius de pesamentu” de su centrudrestra in Sardigna, ma de sempiri funt una seguresa de sa coalitzioni”.
Su benidori de sa Sardigna “est cunditzionau in manera grai de essiri s’isula europea prus a tesu de su Continenti e custu, ancora oi, mancari su mudamentu de sa Costitutzioni chi at fatu imbucai su principiu de insularidadi, benti tratau comenti chi siat unu problema feti sardu e non una chistioni chi interessat sa comunidadi natzionali”.
Chi si partit de totu custu, is riformadoris funt prontus a trabagliai po fraigai sa coalitzioni. Su scritu si frimat innoi e non si chistionat de s’avertimentu chi fut lompiu s’atra dì de Tramatza, aunia si fut atobiau su Grandu Centru de Stevini Tunis e Antoneddu Peru, chi at nau sa matessi cosa. Cun d’una aciunta: “Iat essi una faddina a non s’ascurtai”.
Màuru Mura
Mercuris su 25 de mesi de talamini de su 2023
Foto: https://www.laprovinciadelsulcisiglesiente.com/2019/07/e-iniziata-ieri-nel-medio-campidano-la-stagione-dei-congressi-dei-riformatori-sardi-il-nuovo-coordinatore-e-eugenio-mereu/
