Est in coma in su Santu Camillu de Roma, Luca Serianni, unu de is prus famaus studiosus de sa limba italiana, postu a suta de una machina eriseru a mengianu in Ostia, in su mentris chi passaiat de una orruga a s’atra intru via Isole del Capo Verde e via dei Velieri. S’omini, setantacinc’annus, est gherrendu intru vida e morti: “Est postu mali meda, po sa strutura shock e ‘trauma’”, fait sciri s’assessori a sa Sanidadi de sa Regioni Lazio Alessiu D’Amato.

Sa machina chi nde dd’at boddiu s’est frimada e sa femina chi dda fut guidendu at cicau de agiudai inderetura su studiosu. Serianni ddu ant portau a innantis a su spidali Grassi, de fatu, bistu ca sa situatzioni fut gravi, a su Santu Camillu. Po comenti est totu sussediu c’est s’indagu de is espertus de sa politzia municipali.

Nasciu in Roma in 1947, Serianni at intregau sa vida a su fueddu e a s’analisi de su mudamentu de sa limba latina a cussa italiana, de s’idioma de su populu a su linguagiu de sa poesia, de sa gramatica storica a cussu chi contat po cultura e sociedadi.

Est stetiu professori incarrigau de Storia de sa limba italiana in is universidadis de Siena, L’Aquila e Messina a innantis de diventai oridanriu in sa Sapienza de Roma, aunia at trabagliau de su 1980 a su 2017. A pustis airi trabagliau po is fueddadas toscanas, chi fut su contu de sa tesi de sa laurea sua, Serianni at postu atentzioni manna in sa gramatica, in sa limba leteraria e in is linguagius setorialis. Sotziu de s’Academia de sa Crusca e de s’Academia Natzionali dei Lincei, diretori de is rivistas Studi linguistici italiani e Studi de lessicologia italiana, in su 2010 ddu ant fatu vicepresidenti de sa Sociedadi Dante Alighieri.

In su 2017 su ministeru de s’Istrutzioni ddu at bofiu comenti de agiudu po fairi imparai s’italianu. De annus biviat in Ostia, aunia aprontaiat atobius medas po cultura e sociedadi: ocannu passau iat tentu, in sa cresia de Regina Pacis, tres letzionis in pissu de sa Divina Commedia.

 

19 de triulas de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

 

Foto: https://www.rainews.it/articoli/2022/07/il-linguista-luca-serianni-in-gravissime-condizioni-dopo-essere-stato-investito-da-unauto-92793a3d-582b-44ff-8acc-e3541d45efe6.html