Arfredu Cospito, s’anarchicu chi s’agatat in su presoni de Bancali, aunia ddue depit abarrai po bint’annus a su corantunu bis, po airi postu una bomba in sa caserma de is carabineris de Fossano, est “un’influencer de sa manca”.
Ddu at nau su sutasegretariu a sa Giustissia, Andria Dalmastro, in dd’unu atobiu in Aosta – aprontau de su partidu, a livellu regionali, de Fradis de s’Italia – in pissu de sa chistioni de sa riforma de sa Giustissia. “S’Italia est cussa natzioni stramba aunia candu ses suta indagu o imputau ses unu cosa mala, postu in is primas paginas de is giorronalis, ti podint fairi moviri in dd’una cella chena ci pensai meda e chena chi tui cumprendas su poita. In segus, candu ses cundennau ti oberint is jannas de su perdonu de sa parti politiga de manca, cussu aunia su matessi Cospito mudat in dd’unu ‘influencer’ de sa sinistra, a su cali ddue lompint comenti chi siat sa Mecca. O forsis, po fueddai de chistionis chi non pertocant sa personi mia, comenti de Fricano chi at bociu sa sposa sua cun cincuantaseti corpus de gorteddu e benit fatu bessiri de presoni poita est ingrassau”, at aciuntu, cun riferimentu craru sa su bocimentu sussediu in Santu Tiodoru.
Su deputau piemontesu, arregodaus, est suta indagu, in manera uficiali, po airi scoviau cosas chi non depiat, acapiadas a sa difusioni de paperis propriu po su contu de Cospito.
“Deu ia torrai a fairi totu cussu chi apu fatu in cust’annu chi apu passau de sutasegretariu a sa Giustissia – at aciuntu indenanti a su publicu de su partidu ghiau de sa presidenti de su Consigliu Giorgia Meloni –. Custa est una natzioni strana de averas. S’agatat calencunu chi andat de Cospito aici comenti chi siat un’influencer. Cospito: ‘Po chistionai cun mei depis fueddai cun is camorristas, andat beni?’. Andant a chistionai cun is camorristas, po podint torrai de Cospito, fueddant cun Cospito e in segus c’abarrant mali chi deu scoviu comenti funt andadas is cosas. Est a nai ca cussu chi ant fatu no andat contras sa lei. Ma ateretantu apu fatu deu”.
Màuru Mura
Martis, su cincu de mesi de Idas de su 2023
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.la7.it/laria-che-tira/video/andrea-delmastro-su-lista-ministri-e-presidenti-camere-parto-rapido-e-indolore-vedrete-che-vi-12-10-2022-455415
