Sanidadi e trasportus: dus setoris aunia, po su deputau Perdu Pittalis de Fortza Italia, sa giunta regionali at “faddiu”.
“Andendu de una parti a s’atra de s’Isula – at nau – intendu arriolus mannus. Comenti chi sa politiga non siat capassa de donai una manu de agiudu e non ce dda facat a chistionai a sa genti. Nemus creit ca is problemas de sa sanidadi e de is trasportus si possant risolviri”.
Po sa sanidadi, est a nai, “Teneus ancora genti chi aspetat po una visita finas a otu mesis, spidalis chena diretoris de struturas cumplessas, mancant dotoris in is repartus e una politiga sanitaria totu po Casteddu”. Po cantu pertocat su pesamentu de spidalis nous Pittalis iat airi bistu de prus sa pensada de fairi funtzionai cussus chi giai s’agatant: “Iari castiau de prus a cussu chi mancat in is repartus e mi iessi arriolau chi sa sanidadi funtzionessit in totu sa regioni comenti in Casteddu. Candu non c’ant essi prus custus problemas, tandu si podit pensai a s’orrestu”.
Intru de sa continuidadi territoriali narat: “Is bandus andaiant beni candu in Sardigna s’agataiant is cumpangias comenti Meridiana, Air Italy e sa matessi Alitalia. Oi su mercau est obertu: ma si podiat otenni de prus e meglius. Tenendu contu ca si podiat tenni una relata cun su guvernu natzionali e cun Bruxelles”.
In su fratempus si cumentzas a fueddai ed is eletzionis regionalis e finas de sa possibili candidadura de su matessi Pittalis: “Pensu de averas chi non siat su primu de is problemas. A dogna contu, ndi boddu bogis meda non feti a intru de Fortza Italia, ma finas de atrus partidus. Ia nau ca nou a Berlusconi ca mi boliat in su Consiglu superiori de sa magistradus. Creia ca fui prus de agiudu in Parlamentu a chistionai de giustissia e po trabagliai contras de sa mafia. Immoi trabagliu po su progetu de agatai sa personi chi possat fairi totu”.
Màuru Mura
Martis, su primu de austu de su 2023
Foto: https://www.policymakermag.it/italia/la-separazione-carriere-dei-magistrati-non-e-un-attacco-alla-magistratura-parla-pietro-pittalis-forza-italia/
