Parigi ddu narat a bogi arta: no at a sighiri a pigai atrus migrantis de fatu de is tres mila chi depiant essiri collocaus in Italia.
“No eus a fairi cantu fut stetiu previdiu, s’acoglientzia de unu pagu de prus de tres mila personis in is mesuras de solidariedadi europea”, at nau su portabogi de su guvernu francesu Olivier Veran, intervistau de sa Bfm-Tv. Po Veran “Giorgia Meloni est cussa chi prus at perdiu in totu custa situatzioni”.
“S’Italia – at sighiu a nai Olivier Veran – non tenit fidi a s’impignu fundamentali in su mecanismu de solidariedadi europea, nosu non eus a mantenni s’imbessi, s’acoglientzia de 3.000 migrantis chi immoi s’agatant in territoriu italianu”.
S’Italia, at aciuntu, “est perdenti poita disponit de unu mecanismu de solidariedadi europeu chi fait ca giai chi unu numuru artu de Stadus europeu, Francia e Germania massimamenti, si pighint s’impignu de s’acoglientzia in cambiu de is navis chi ddus depint fairi calai in is terras italianas”.
Cumpudus medas, in su fratempus, in is lacanas intru de s’Italia e de sa Francia in Ventimiglia. Is agentis francesus frimmant s’imbucada de is migrantis e po mori de custus cumpudus in sa lacana ddue funt filas de machinas finas a unu chilometru.
De sa chistioni at fueddau finas su piscamu de Ventimiglia Antoni Suetta: “Sa reatzioni de sa Francia est tropu manna, no est umanu de dogna puntu de vista de solidariedadi, pagu onesta”.
S’ambasciadori tedescu in Italia, Viktor Ebling, at chistionau cun fueddus durcis de is ong: “In su 2022 funt giai prus de 1.300 sa genti morta in su Mediterraneu, unu 12% de cussus chi ce dd’ant fata ddu depint a is ons. Isssu sarvant vidas aunia mancat s’agiudu de is Stadus. Nosu non podeus che torrai gratzias po su trabbagliu chi faint”, at scritu in Twitter.
Ma Salvini, sempiri in Twitter, amelessat ca su Guvernu at a umperai una manu ancora prus tostada.
Màuru Mura
Lunis su catodixi de Sant’Andria de su 2022
Foto: https://questure.poliziadistato.it/it/Imperia/articolo/87060b65f065deb2995261738
