Gaietanu Oristanio, chi oi lompit is bintun’annus de idadi, chistionat de sa partida perdia dì innanti de eris. Imbucau a pustis su pasu, lassendu in is aposentus de su spogliatoiu Mateusz Wieteska, po cicai de paregiai sa partida, at provau a donai una manu, ma, finas chi at giogau beni, non ce dd’at fata.
“Pensu chi sa partida dda eus giogada beni, eus tentu gana e finas unu pagu de barra. Eus pigau is gol in su tempus aunia fustis atachenduru. Nos ant postu in dificultadi, massimamenti in sa conca. A pustis eus torrau a provai a nosi dda giogai e in calencuna parti de partida ddu eus fatu beni de averas. Soi cuntentu de sa partida chi eus giogau deu e sa scuadra totu”. Oristanio podit essiri allirgu de cussu chi est fenduru in custu cumentzu de campionau, dominigu passau nd’at boddiu finas una traversa in Bergamo contras de s’Atalanta. “Soi allirgu meda de custu cumentzu. Torru gratzias a totu sa sociedadi de su Casteddu po custa oportunidadi chi m’at donau. Ndi lompu de dus annus in Olanda, aunia mi soi agatau beni meda e apu fatu esperientzia. Sa gana de torrai in Italia, a dogna modu, ci fut totu. immoi su caminu est apena cumentzau e ce dda eus a ponni totu po nosi ndi torrai a pesai. Ddu eus a fari cun su trabagliu e cun s’unidadi de truma”.
Oristanio est lompiu in Casteddu prestau de s’Inter e po sa prima bia s’agatat in su campionau de Serie A, a pustis airi giogau in Olanda cun su Volendam, e ddu at finas bintu unu campionau, in sa serie B. “Sa Serie A est unu campionau dificili meda, tocat a poderai cun su fisicu, ma finas cun sa tecnica e cun sa tatica. Seus, de seguru, in d’unu tempus non facii, perou sa scuadra e s’anima ddas tenus. Depeus feti sighiri a trabagliai e feti ascurtenduru is consiglius de is personis chi tentit prus esperientzia de mei podeus totus migliorai”.
Màuro Mura
Cenarba su bintinoi de cabidanni de su 2023
Foto: https://www.fantamaster.it/oristanio-cagliari-scheda-fantacalcio-consigli-asta-ranieri/
