Una partida binta beni cussa de su Casteddu, cenarba a noti, contras de s’Ascoli. A pustis una prima parti legia de averas is piciocus de Ranieri, in sa segunda parti, ant giogau beni e fatu cuatru gol, comenti non sussediat de tempus meda.
Lapadula duas bortas, Mancosu e Zappa ant fatu cumprendiri a sa scuadra marchigiana chini cumandaiat. Immoi tocat a sighiri in custu caminu e giai s’at a biri in sa partida de cenarba contras de sa Reggina.
Speciali est stetiu su gol de Marcu Mancosu. Intantis poita at arregalau a su Casteddu su 2-1 po giumpai is ascolanus. E in segus poita at permitiu a Mancosu, arremonaus piciocu casteddaiu in totu, de lompiri a is centu gol de candu est professionista.
Mancosu at fatu gol sempiri, de sa Serie A a sa C, partendu, custa est una crosidadi, propriu de s’Ascoli. Difatis su gol de unu de Marcu est cussu de su bintiseti de maju de su 2007, cun in pissu sempiri sa maglia de su Casteddu.
Mancosu, piciocu seriu e de animu bonu, at festau custu traguardu scriendu unu “post” in Instagram: “De Ascoli a s’Ascoli, de su primu a su de centu. Ddu fui aspetendu de diora custu gol e s’est fatu disigliai meda, comenti est giustu chi siat. Fui unu piciocheddu chi giogaiat cun sa Johannes. Po su fubalu apu tentu sempiri una passioni manna chi est abarrada aici finas immoi. Gratzias a s’amori po sa bocia soi lompiu a custu traguardu chi mi allirgat su coru poita est erribau a pustis suferentzias e dificultadis mannas e de arregodai ca apu fatu gol in totu is campionaus chi apu giogau. No est possibili a non cicai su Lecce e su Casteddu, is scuadras chi tengiu de prus in su coru: gratzias!. Serru cun d’una cosa chi forsis po calencunu non c’intrat meda, ma po mei est de importu mannu. Funt passaus pagu de prus de dexi annus de sa morti de Carmelo Imbriani, chi apu tentu comenti de allenadori e omini spantosu. Custu est su libburu de su fradi, unu chi at boffiu beni a Carmelo. Gratzias Carmelo, custu gol est meritu tou e deu ddu sciu de seguru”.
Màuru Mura
Lunis, su trexi de martzu de su 2023
Foto: https://www.rainews.it/tgr/sardegna/video/2022/08/alla-domus–mancosu-show-cefa6b8a-5da7-4e7f-a76e-f7b2efbb0322.html
