Totu su mundu s’aprontat a arrespundiri a sa guerra intru de su cumerciu posta in peis de Donald Trump in pissu de is datzius, chi in su paperi de s’aministratzioni funt tzerriaus “reciprocal tarifs”. In su paperi, amostau s’atra dì a is giornalistas in su Giardinu de is Orrosas de sa Domu Arva e chi est de otu paginas, si ddue agatanta is tabellas chi amostant Natzioni po Natzioni is datzius prontus a boddiri natzionis amigas e nemigus de is Stadus Unidus de s’America. In pagus fueddus, una percentuali po totus de su 10%, est a nai a natzionis che su Regnu unidu, s’Australia e su Brasile, e percentualis personalizadas po is Natzionis “peus”, est a nai a cussas natzionis chi ant postu datzius in pissu de is cosas americanas. Funt a su 25% is datzius po is veturas strangias. E Trump amelessat puru: “Chi non feis a bonus, nosu artziaus sa percentuali”.

A pustis chi ant fueddau sa presidenti de su Consigliu Giorgia Meloni e su ministru de s’agricoltura Lollobrigida, at pigau fueddu finas sa segretaria de su Partidu Democratigu Elly Schlein: “Tocat a arrespundiri totu paris comenti de Unioni Europea in manera frima. Iat a tocai a ponniri Trump cun is palas a su muru e a ddue chistionai cun feti una bogi, poderendu sa schina ereta po ponni a un’ala sa pensada de una guerra intru de su cumerciu, finas po cicai de non fairi spostai is aziendas europeas”.

Finas s’UCI, est a nai s’Unione Coltivatori Italiani, cun su presidenti Mariu Serpillo, fait indendiri sa bogi sua: “Su pesamentu de is datzius americanus a su 20% in pissu de is prodotus italianus est una lastima manna chi non si podit biri. De seguru at a tocai totu sa filera nosta e eus a perdiri dinari meda. Castiendu is contus seus arriolaus meda ca at essi intru de is cuatru e is seti miliardus de eurus cussu chi sa filera nosta at a perdiri”.

 

 

 

 

Màuru Mura

 

 

 

Martis, s’otu de arbili de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.lastampa.it/politica/2023/06/08/news/elly_schlein_le_faide_della_papessa-12846306/