“ Eus a donai totu cussu chi teneus a intru po torrai a portai su Casteddu aunia depit abarrai sempiriri” Dddu narant paris Pippo Falco cun Elio Capradossi, dus de is giogadoris nous de su Casteddu erribaus in is urtimas dis de su merdau de Cabidanni..

Non bint s’ora de giogai e de agiudai sa scuadra e ddu faint cumprendiri a is giornalistas in s’aposentu de sa Unipol Domus aunia si funt fatus connosciri, a innantis cun is fueddus e, eus a biri po cussu chi ant a donai in campu.

De seguru si depint ponnni a su passu de is atrus giogadoris massimamenti cun is allenamentus, prus che a totut s’atacanti ca – comenti at nau cussu e totu – mancat su campu poita s’est allenau a sa sola. Ma de is fueddus si’intendit ca sa gana no ddi mandat, e arregodaus ca lompit de una de is scuadras prus famadas de totu s’Europa: sa Stella Rossa de Belgrado.

“Apu imparau meda in Serbia, cussu chi apu biviu est de importu mannu, narat, est unu fubalu chi non est oguali a su nostu. Torru prus carrigu e bogliu fairi su meglius chi possu cun sa maglia de su Casteddu. Torrat a agatai cumpangius de scuadras becius comenti Mancosu, Lapadula e Viola e unu de is allenadoris chi at tentu prus fidi in issu, Liverani. “Connosciu beni cussu chi bolit Liverani, e apat fairi de totu po ddu allirgai. Su ruolu? Non contat meda, cussu chi contat est comenti si moviri in campu”. At scioberau su numuru 25: “Ddu portaia candu apu cumentzau de piciocheddu e mìat agiudau sempiri”.

Capradossi, difensori, at a tenni su 24 in is palas: “Su Casteddu est una grandu scuadra e una grandu sociedadi. Tenit unu progetu craru chi est cussu de torrai inderetura in Serie A. Est po custu chi no apu tentu peruna duda po lompiri in s’Isula. A s’imbessi de Falco, su difensori at fatu totu sa preparatzioni cun su Spetzia e non timit a nai “ca soi gai prontu a giogai”.

 

 

 

Màuru Mura

 

 

Su seti de Cabudanni de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

 

Foto: https://www.itasportpress.it/calcio/pippo-falco-orgoglio-essere-alla-stella-rossa-stankovic-mi-ricorda-mourinho/