De dinnanti eriseru funt cumentzaus is otavus de finali de sa Coppa Italia de fubalu. Sa formula est cussa connota, unu sciolloriu chi bit is scuadras mannas intrai feti immoi. Sa prima scuadra chi est lompia a is cuartus est s’Inter de Simoni Inzaghi chi at fatu foras, sunfrendu e agatendu su gol de su paregiu feti a s’acabbu de is noranta minutus cun Lautaro, su Parma de Pecchia, scuadra pitica chi giogat in serie B. Spantu mannu ca si creiat ca s’Inter iat airi bintu chena problema perunu.
Galu prus spantosu s’arresurtau de eris a merì: su Torino de Juric at bintu in Milanu contras de is campioni de s’Italia de ocannu passau po unu a zeru a pustis de centubinti minutus. Su spantu mannu est ca ddu at fatu gioghendu po cuasi un’ora in dexi contras de undixi, ca s’arbitru Rapuano c’at stupau foras a Djidji de su Torinu po dus cartellinus grogus, e ca su gol est stetiu fraigau de dus piciocheddus, Bayeye cun Adopo, chi, ocannu, ant bidu su campu in pagas ocasionis. Bayeye e Adopo ocannu passau giogaiant in sa serie C cun in pissu ma magligedda de su Catanzaro e de sa Viterbese. Piciocus de bintidus annus, si funt incrarendu in su fubalu chi contat cun umiltadi e gana de erribai.
Non si ddu aspetaiant in Milanu, creiant de dda binciri custa partida, ma iant fatu mali is contus. Funt lompius in San Siro tifosus medas po festai, ma a s’acabbu funt torraus a domu cun su coru in tristura. Forsis creiant ca su Torinu fut una scuadrigedda, ma depiant airi cumprendiu, giai de su primu tempu, ca chena barra e gana de curriri non si lompit a perunu logu. Festa manna, invecias, po is giodadoris de su Torinu e po is tifosus chi non lompiant a is cuartus de finali de annus e annus.
Una cuntierra sa partida, comenti eus giai nau, acabbada a pustis de centubinti minutus. Si dd’ant gherrada is piciocus de Juric, comenti non sussediat de meda.
Immoi sa scuadra de Buongiorno, Singo, Rodriguez e Lukic aspetat po connosciri chini, intru de Fiorentina e Sampdoria, at atobiai, ma po s’ora sighit a festai.
Màuru Mura
Giobia, su doxi de gennargiu de su 2023
Foto: https://www.tuttomercatoweb.com/i-fatti-del-giorno/milan-la-coppa-italia-dura-una-sola-partita-stoico-torino-ai-quarti-giocando-in-10-per-50-1777948
