A pustis duas partidas perdias cun sa Latzio e cun su Spetzia su Casteddu torrat a partiri cras a merì, in su campu amigu contras sa scuadra peus chi si possat atobiai in custus tempus: su Milan de Pioli chi est sa scuadra chi ghiat sa classifica de Serie A.

S’allenadori de is orrubius-asulus at chistionau cun is giornalistas pedendu massimamenti “atentzioni, resistentzia e gana”, poita “is scuadras mannas, comenti de su Milan, ti punint a su primu sbagliu chi fais. Su Milan tenti calidadi e scit giogai a sa lestra candu depit torrai a partiri candu faddis poderendu sa bocia”.

“Is urtimas duas partidas perdias, sighit a nai Mazzarri, a pustis unu cumentzu de annu de averas bellu, non si depint fairi perdiri sa fidi e is cosas bellas chi eus fatu. In custa cida eus trabagliau beni e depeus sighiri de aunia nosi seus frimaus cu sa partida de Torinu. De seguru non depit andai beni feti custu, ma serbit finas unu pagu de bona sorti, de importu mannu est chi bengiant is ocasionis e cicai de ponni a un’ala cussu chi eus faddiu contras de su Spetzia e cun sa Latzio”.

Comenti at a giogai su Casteddu? Mazzarri tenit is ideas craras: “Non c’intrat nudda, seus capassus de giogai cun su 3-5-2, su 3-5-1-1 e su 3-4-2-1. In is urtimas partidas cussu chi est beniu de mancu est sa barra e is sbaglius chi eus fatu atachendu e difendendunosì. No est a biri unu giogadori prus a innanti o prus a palas chi mudati s partidas, est sa gana chi si ddue ponit”.

Baselli e Marin paris a centrucampu? Pregontat calencunu? “Imoi est dificili meda a fairi giogai dus giogadoris tecnicus cun dus atacanti paris – arrespundit s’allendori toscanu – est a biri comenti sa scuadra abarrat unia, ma oi est dificili a non tenni unu chi seghit su giogu in campu”.

E su Milan? “Nosu non si podeus permitiri de giogai beni e bastat, e cun prus arregioni contras is scuadras meda prus fortis. Nosi depit intrai in conca sa gana de andai a innantis in su campu, ma cichendu de abarrai prus segurus in palas. Non podeus faddiri, comenti eus fatu cun su Spetzia, sbaglius in is bocias frimas e depeus sighiri a trabagliai de prus”.

 

 

18 de martzu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.dazn.com/it-IT/home/dx2pv1bcomjc47as5gblbdn9w