Carrulu e Camilla, rei e regina de su Regnu Unidu, si funt amostaus a su Paba Franciscu. Totu faiat pensai ca is realis no iant airi atobiau a Franciscu, po mori ca iant postu a un’ala, pensendu a sa saludi de su Paba, totu cussu chi pertocaiat sa parti de su Vaticanu, in custu caminu italianu chi cunt fendu de una pariga de dis.
“Su rei Carrulu cun Camilla si funt allirgaus meda po cust’atobiu”, ant fatu sciri de Buckingham Palace.
“In sa ciaciarrada intru de Franciscu e is realis ingresus, su Paba at tentu manera de fairi is augurius a Carrulu cun Camilla, ca sa dì fut sa matessi de candu is dus si funt coiaus. E is realis ant fatu su matessi po cantu pertocat sa saludi de Franciscu”, aciungint de s’aposentu de sa stampa vaticana.
In sa fotografia de s’atobiu, fata girai in su mengianu de sa matessi stampa vaticana, su Paba s’amostat cun s’errisigeddu intru de is lavaras e chena peruna machina po ddu fairi sulai. Su Rei poderat unu pachigeddu orrubiu in manus, de seguru calencunu arregalu o po su Paba o de su Paba etotu, in su mentris chi, invecias, Camilla stringit sa manu de Franciscu, setziu in dd’una poltrona.
Totu at cumentzau a si moviri biora de is cuatru e mesu, candu Carrulu e Camilla ant giumpau sa Janna de su Perugino, cussa prus acanta a Domu Santa Maria, s’albergu aunia bivit Paba Franciscu. A pustis imbucaus in sa Citadi de su Vaticanu, funt intraus in s’albergu de una porta chi s’agatat a un’ala, forsis po poderai s’atobiu feti intru de issus. Ma, est finas a nai ca a intru fut totu aprontau, difatis furint giai prontus is arregalus po is realis.
Massimamenti Carrulu cun Franciscu, in is urtimus tempus, si funt amalaidaus, ca Carrulu est gherrendu de unu pagu cun dd’unu cancuru e de Fraciscu giai si connoscit dogna cosa.
Un’atobiu intru de amigus, non longu meda, a s’acabbu de su cali is realis ant giumpau, a s’imbessi, sa matessi Janna de su Peruginu.
Màuru Mura
Mercuris, su noi de arbili de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.vaticannews.va/it/papa/news/2025-04/papa-francesco-incontro-privato-carlo-camilla-vaticano.html
