In Sardigna, de tempus meda, candu calencunu, o calencuna, lompit is cent’annus non fait prus notitzia. A ddue pensai, invecias, est una nova bona po totus. Est prena s’Isula nosta de genti chi at lompiu e giumpau su seculu de vida e cuasi in dogna bidda ant tentu ominis e feminas cun is cent’annus. Est unu spantu e bolit nai ca sa vida in terra sarda est sempiri bona po cantu pertocat sa cosa de papai, s’incuinamentu e is arriolus.

Ma, cun una pariga de Cumunus chi funt imbucaus in sa Blue Zone, in Sardigna teniaus s’omini, o sa femina, prus becius de su mundu? Po cantu si ligiat in su “Guinness dei primati” nou, ca s’agataiat in Francia. Nova de oi est ca s’est morta e iat lompiu is centu e dixiot’annus. Fut una mongia, Suor André si tzerriat, e in su “Guiness” fut intrada de cuasi un’annu a-i custa parti, in su mesi de arbili de su 2022. Suor Andrè, comenti eus nau, teniat centu e dixiot’annus e sa data de nascioni est stetia verificada e arreconnota de chini aprontat su libburu de is records, a pusti chi sa giaponesa Kane Tanaka, de centu e dixiannoi annus, si fut morta su 25 de arbili de ocannu passau.

Sa mongia francesa est morta in su sonnu in sa domu de pasu de Tolone, aunia s’agataiat de tempus meda. In is urtimus mesis iat amostau suferentzia e naraiat a totus ca fut straca de biviri: “Deus miu non m’ascurtat”.

Suor André, tzurpa e frima in d’una cadira a orrodas, fut nascia s’undixi de friargiu de su 1904 in Alès, su nomini su, a innantis de diventai mongia, fut Lucile Randon.

“Si narat ca su trabagliu bocit, ma a mei su trabagliu m’at fatu biviri. Ddu apu fatu finas a candu ia lompiu is centu e ot’anuus”, iat nau in su mesi de arbili de ocannu passau candu fut diventada sa femina prus becia de su mundu.

No at passai tempus meda chi eus a connosciri chini immoi si pighit custu record de vida longa. At essi calencunu sardu?

 

 

Màuru Mura

 

 

Mercuris, su 18 de gennargiu de su 2023

 

 

Foto: https://www.amazon.it/Guinness-World-Records-2022/dp/1913484106