Arfonsu Tumbarellu de settant’annus, su dotori chi teniat in cura Andria Bonafede, ma fut Mateu Messina Denaro, est a suta de indagu de parti de is magistraus, a pustis chi su boss, s’atra dì in Palermo, est stetiu acapiau.

Tumbarello est de Campobello de Mazara e po annus medas fut unu de is dotoris chi si pigaiat cura de cussus chi biviant in custa bidda. Totu custu fintzas a su mesi de Idas passau, ca de tandu est imbucau in pensioni. Duncas fintzas a pagus mesis a oi fut su dotori de Andria Bonafede, cussu beru, cincuantanoi annus, chi bivit in sa matessi bidda e at fatu arretzetas meda a nomini de su geometra, indagau cussu puru.

Eriseru is carabineris ddu ant intendiu e ant cumpudau, pramu a pramu sa domu sua e su studiu aunia faiat su dotori. In su 2011 Tubarello si fut candidau a is comunalis de cuss’annu po diventai sindigu in Campobello de Mazara: beniat votau de sa lista de “Popolo delle Libertà”, e iat pigau su 7,55% de is votus. Annus a innantis, in su 2006, si fut candidau a is regionalis in sa lista Udc, po agiudai Toto Cuffaro, chi est oi comissariu regionali de sa Dc, a pustis airi fragau su presoni po set’annus po sa curpa de airi agiudau Cosa Nostra. Cuffaro cussas eletzionis ddas iat bintas contras de Rita Borsellino, sa sorri de Pàulu, bociu de sa mafia in orruga D’Amelio su 19 de triulas de su 1992. Galu, annus a innantis, in su 2003 Tumbarello fut imbucau in su consigliu provinciali de Trapani, sempiri cun sa lista de s’Udc.

“Chini est portendu a innanti su indagu at a acrariri eita tenit a bri su dotori Arfonsu Tumbarello cun Mateu Messina Denaro, ma est seguru ca cun mei non tenit nudda de eita biri”, narat Totò Cuffato, acrarendu a dogna manera ca su dotori “non fut candidau cun sa lista mia, ma in cussa de s’Udc”.

“In su 2011, candu boliat fairi su sindigu, deu fui giai in presoni e, duncas, non ddu apu possiu scioberai comenti de candidau”, aciungit sempiri Cuffaro.

 

 

Màuru Mura

 

 

Mercuris, su 18 de gennargiu de su 2023

 

 

Foto: https://www.altoadige.it/video/campobello-di-mazara-il-paese-dove-si-nascondeva-messina-denaro-1.3404091