In Sardigna, a una cida chi is scolas torrint a oberri, s’89,4 % de sa genti chi ddue trabagliat at fatu sonumancu unu de is dus vacinus chi si iant depiri fairi. A donai su numuru est s’assessori regionali de s’istrutzioni Andria Biancareddu. Numurus chi faint allirgai su coru po ponni sa scola in seguresa, finas chi iat essi coas beni fata a erribai a su 100%, ma giai ddu eus a erribai…

Su primu vacinu ddu ant fatu su 93,2% de is dirigentis scolasticus, su 90,5 % de is professoris, su 90,7% de chini professori no est, su 86,3% de is suplentis, s’85,5% dei is professoris chi trabagliant in s’universidadi, s’84,8% dei is professoris prus mannus e s’86,1% de chini s’agatat in is scolas chi non funt feti statalis. Biancareddu at fatu sciri is numurus, eriseru in Consigliu regionali, arrespundendu a sa duda de Pieru Comandini de su partidu democratigu.

“Numurus chi donant fidi, at nau s’assessori, finas chi a sciri ca teneus digiotu dirigentis scolasticus chi no ant fatu su vacinu e po custu podeus nai de ddis donai croba manna”.

“Atra nova bona, at sighiu a nai Biancareddu, est ca su 69% de is discientis est vacinau finas chena perunu obrigu, sa scola depit torrai a partiri in presentzia e is numurus nos agiudant”.

In su mentris in s’Isula funt norantanoi is impestaus nous in pissu de 2.298 tamponis. Funt tres is mortus chi s’aciungint a custa pesta maladita: un’omini de otantatres annus de sa provincia de Tatari, una femina de otantaset’annus chi biviat in sa Citadi metropolitana de Casteddu e de un’atra de sa provincia de Nugoro. Si ndi pesat de dus su numuru de chini s’agatat in terapia intensiva (imoi funt trinta), ma calant de tres cussus chi s’agatant in is atrus aposentus de is spidalis (imoi funt 232).

Est a nai puru ca atrus 276 ndi funt bessius de s’incungiamentu in domu e imoi, acorraus, s’agatant in 6.029.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://www.corriere.it/scuola/secondaria/20_marzo_27/covid-19-scuole-chiuse-tutti-promossi-chi-ha-debiti-potra-recuperare-41e0d170-7030-11ea-82c1-be2d421e9f6b.shtml