Coidai po si fairi agatai prontus cun d’una scuadra de guvernu forti e unia po partiri inderetura cun is problemas prus mannus chi s’Italia tenit, a innantis de totu is bulletas cun su pretziu tropu artu.

Salvini, Meloni e Berlusconi si funt atobiaus in sa domu de su capu de Fortza Italia in Arcore. Coidai est su primu fueddu, Giorgia Meloni at postu in craru ca chi Mattarella iat depiri donai a issa s’incarrigu si bolit fairi agatai pronta e fairi nasciri su guvernu in pagu ora.

Is urgentzias de binciri, at nau a is atrus dus, “funt dificilis e urgentis, po custu is tempus depint essiri lestrus”. A s’atobiu ddue furint finas Robertu Calderoli e Ignatziu La Russa.

Custu su documentu, firmau de totu e is tres: “Nosi seus chistionaus po cantu pertocant is scadentzias istitutzionalis e po fairi unu guvernu forti chi siat capassu de arrespundiri a is urgentzias prus mannas de s’Italia, in conca teneus sempiri comenti puntu primu su pretziu de s’energia. Eus fatu passus de importu mannnu intru de nosu e pensaus de andai in cussa diretzioni. Custu est su caminu chi tenenus in conca e teneus volontadi manna po cicai de coidai”.

Sa Lega fait sciri de tenni crara in conca sa scuadra sua de guvernu, comenti a nai ca Mateu Salvini est prontu a ndi fairi parti.

Sa cuntierra est, a dogna manera sempiri oberta: si chistionat de is incarrigus e de is bilanciamentus intru de is fortzas politigas, partendu de is presidentzias de is duas Cameras, is primus nominis chi depint prenus. Calencuna bogi narat de Montecitorio a sa Lega, e calencun’atra narat ca su Carrociu bolit su Senau.

Giorgia Meloni in is profilus social chi sighit si dda pigat cun sa manca, po non perdiri s’abitudini: “Seus bivendu in d’unu mundu de sciollorius aunia sa Manca – chi est ancora in su Guvernu – calat in is prassas contras de su Guvernu Meloni chi ancora no est mancu fatu. Cumprendu beni sa gana de morrungiai a pustis annus de politiga aunia non s’est fatu nudda e nos ant portau a custa situatzioni, ma su pensamentu nostu est cussu de torrai a donai unu benidori a s’Italia. Tra pagu giraus pagina, fut fintzas ora”, at scritu.

 

 

Màuru Mura

 

 

Lunis, su dexi de mesi de talamini de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://www.agenzianova.com/news/berlusconi-in-linea-con-meloni-e-salvini-per-dare-allitalia-un-governo-di-alto-profilo/