De binti dis a cust’ala is notis in Ucraina funt sempiri sa matessi cosa. Binti dis de bombas, de disisperu mannu e de genti chi si fuit. In su noti sonumancu tres scopius de bombas in sa zona prus bivia in Kiev, intendias in totu s’orrestu de sa citadi. Boddiu unu papalatzu de cuindixi pianus in su biginau de Sviatochine, in sa parti ocidentali de sa capitali: domus medas in pampas. Po cussu chi narant is ucrainus si contant dus mortus: “Eus agatau dus corpus chena prus vida, ma ce dda eus fata a sarvai bintiseti personis”.
De sa parti de sa diplomatzia oi is russus e is ucrainus s’ant a atobiai ancora una borta (in su video e non in presentzia) po sighiri a chistionai. “Dificilis ma cun calencunu passu a innanntis”, ant nau is ucrainus de s’atobiu de eriseru. Is ucrainus pedint a bogi arta de dd’acabai cun su fogu e chi is russus torrint a domu insoru.
Sa guerra in Ucraina at a acabai a intru de su mesi de maju “poita sa Russia no at a tenni prus dinari po sighiri”, narat Oleksiy Arestovich, consiglieri de su presidenti ucrainu, nendu ca “su tempus giustu de candu at a acabai s’at a biri candu su Cremlinu decidit de cantu ponni in custa bataglia”. “Pensu chi a intu de su mesi de maju, at cicau de spiegai, s’at agatai un’acordiu de pagi, forsis tempus a innantis finas. Seus intru dus caminus, imoi: o agataus sa pagi coidendu meda, a intru de una o udas cidas, cun is russus chi si ndi torrant a domu e totu s’orrestu, o si sighit cun atras pensadas de chini est intrau de nosu. Pensu a is sirianus chi possant agiudai is russus. Iat essi unu machimini tropu mannu cussu de is russus chi facant partiri atrus sordaus, noeddus, cun peruna esperientzia”.
In su mentris sa Cina – cun is fueddus de su diretori de sa comissioni de is esterus de su partidu comunista Yang Jiechi – cumbidat totus a “abarrai trancuillus” in custu tempus de crisi.
15 de martzu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.lanotiziagiornale.it/guerra-ucraina-quando-finira-e-possibili-soluzioni-i-5-scenari/
