Funt sessant’otu, de su cumentzu de s’annu is mortus in is stradas de sa Sardigna, feti undixi in custu mesi de cabidanni, chi non est mancu galu acabau.
In s’urtima cica de s’Istat fait apilurtzai sa percentuali de is mortus, chi est finas prus arta de cussa media de s’orrestu de s’Italia. Difatis in Sardigna funt 6,3 mortus po centumila abitantis e in s’orrestu de s’Italia, cun 3.159 mortus in su 2022, sa media est de 5,4, sempiri in pissu de centumila abitantis.
S’urtimu incidenti, in sa provinciali numuru 2 de su Sulcis, torrat a fairi chistionai de is morrungius de sa genti po tenni caminus prus segurus, chi paris a sa tropu lestresa, a is distratzionis e a pagu conca in su guidai, est una de is curpas prus mannas po totu custus mortus. In is statalis si ddue agatant ancora incrocius perigulosus, cussus chi in italianu ddi narant “a raso” e atrus orrogus de strada perigulosus e erriscosus. Invecias in sa rete provinciali s’agatant atrus perigulus comenti cussu de s’asfaltu beciu e iscliscinosu opuru ca is carregiadas non funt dividias.
Giuanni Batista Marotto, cumandanti de sa politzia municipali de Casteddu ponit s’acentu intru de is curpas prus mannas de is incidentis in citadi: “Non si rispetant is regulas de su codici de sa strada, a fairi un’esempiu agataus candu si superat atra machina finas chi ddu est sa linea ereta, ca depit essi pensada comenti chi ddue siat unu muru, sa velocidadi tropu arta e sa distratzioni, depia, massimamenti, a s’umperu de su telefoneddu in su mentris chi s’est guidendu”. Feti in Casteddu de su cumentzu de custu 2023 si agatant cuatru incidentis mortalis cun seti mortus in totu, s’urtimu est cussu de is cuatru piciocheddus in su arbeschidorgiu de su dexi de custu mesi in Viale Marconi chi at lassau a buca oberta dogna omini de bona volontadi.
Mauru Mura
Mercuris su binti de cabudanni de su 2023
Foto: https://www.corrieredellosport.it/news/motori/news-motori/2020/11/03-75767022/incidenti_stradali_nel_lazio_ecco_le_strade_piu_pericolose_della_capitale_e_non_solo
