De dominigu chi benit su Casteddu de Ranieri cumentzat sa prima de cuatru partidas dificilis medas. Difatis a is tres de a pustis prangiu de su 24 si cumentzat cun s’Atalanta, chi non tocat mancu a presentai po cantu est forti. Mercuris 27, in sa Unipol Domus at a lompiri su Milan de Pioli, cun su cumentzu de sa partida a is ses e mesu de merì. Eita tocata anai de su Milan? Una de is scuadras prus fortis de sa Serie A chi at a gherrai po su scudetu. Su dus de mesi de Talamini, cun cumentzu a is noi oras mancu unu cuartu su Casteddu bolat a Firenze po si dda giogai cun sa Fiorentina de Italiano, atra scuadra forti de averas chi in domu est unu spantu. Sa cida infatu lompit in Casteddu un’atra scuadrigedda chi fait a timiri: Sa Roma de Mourinho, Dybala e Lukaku. Ma su Casteddu depit cumentzai a fairi puntus cun totus ca chindechino is atras scuadras ant a cumentzai a si stesiai.

S’atra dì in su fratempus funt stetius presentaus dus giogadoris nous, Pantelis Hatzidiakos e Mateusz Wieteska. Grecu su primu e polacu s’atru. In cumunu tenint s’annu de nascioni e ca scint chistionai beni meda s’inglesu. E in prus tenint finas cuss’esperientza chi Ranieri pediat a bogi arta partenduru de sa prima dì de su ritiru in sa Baddi de Aosta. “Custa in Serie A est po nosu un’ocasioni manna, arrepitint paris is dus giogadoris nous de su Casteddu in s’atobiu cun is giornalistas in s’aposentu de sa Unipol Domus. Ranieri no at aspetau nudda po ddus fairi giogai e is dus ant arrespustu de averas beni.

Po lompiri in Casteddu is dus ant ascurtau finas is fueddus de dus atrus giogadoris becius: Hatzidiakos at intendiu a Lykogiannis  e Wieteska, invecias a Walukiewicz. “Apu fatu custu scioberu poita Casteddu est unu logu de importu e is tifosus de is meglius in Italia. Da poi c’est Ranieri e non depu aciungiri atru”, at naus su grecu.

“Mi pragit su fubalu italianu. Innoi tocat a difendiri meda, cunfroma a su campionau de sa Francia no apu agatau diversidadis medas, po cantu pertocat a atacai o a si difendiri. Ma sa calidadi de sa Serie A est prus arta”, is fueddus de su polacu.

 

 

Màuru Mura

 

Cenarba, su 22 de Cabidanni de su 2023

 

Foto: https://www.fantamaster.it/cagliari-udinese-ranieri-lapadula-seriea-fantacalcio/