Joe Biden, su presidenti de is Stadus Unidus, cara a cara cun Vladimir Putin, presidenti de sa Russia, po chistionai de sa chistioni ucraina e po cicai de fairi lompiri in is Usa is citadinus americanus tratennius in Russia? “Dipendit”.
Ddu at nau su matessi presidenti americanu, arrespundendu a una pregunta in pissu de unu possibili atobiu cun su capu de Mosca in su G20 in Indonesia.
“No apu peruna gana de atobiai a Putin – at nau a fueddus crarus e tundus su numuru unu de Washington – ma chi po esempiu iat lompiri de mei nendumì ‘Bogliu chistioani de sa libertadi de Griner’, feti tandu ddu ia biri. Totu dipendit de ita bolit fueddai”, narat Biden fendu riferimentu a Brittney Griner, s’americana impresonada in Russia.
Biden at fintzas chistionau de s’erriscu chi sa cuntierra intru de Mosca e Kiev si ndi pesit ancora de prus e de su perigulu chi s’esercitu russu umperit armis nuclearis. “Non pensu chi Vladimir Putin ddas umperit”, at nau su presidenti de is Stadus Unidus, in una intervista a sa Cnn. “Chi ddu iat a fairi – at aciuntu – is arresurtaus iant essi terribilis”.
In s’intervista a sa televisioni americana prus famada est torrau a cundennai totu is machiminis chi is sordaus russus funt fendu in Ucraina, feti in su Donetsk, in custas oras, ndi funt bessendu a campu corpus de genti meda cun sinnus de violentzia, e tra custus ddue nd’at de pipius puru, po non chistionai ca est stetia agatau un’aposentu chi faiat de presoni po torturas.
Unu tertzu de is infrastruturas energeticas in Ucrainas est stetiu boddiu de is missilis russus de lunis. Ddu at nau eris, in sa Cnn, su ministru de s’Energia ucrainu Herman Halushchenko, acrarendu ca “est sa prima borta de su cumentzu de sa gherra” chi sa Russia at “mirau” a is infrastruturas energeticas.
Po su ministru una de is curpas est cussa de is esportatzionis de s’eletricidadi ucraina in Europa chi duncas “agiudant is stadus europeus a no ispendiri dinari po su gas e su craboni russu”.
Màuru Mura
Mercuris, su 12 de mesi de talamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.ilmeteo.it/notizie/guerra-in-ucraina-biden-avverte-putin-vi-diciamo-cosa-potrebbe-succedere-adesso-091310
