Is carabbineris de sa procura de Siracusa, in Sicilia, ant cumpriu una cica in is cunfrontis de binticuatru personis, e otu tra issus – dus meris de aziendas e ses “caporalis” – si creit ca funt responsabilis, po paricias curpas e de acordiu, de sfrutamentu in pissu de is palas de bintiseti trabagliadoris in nieddu, seixi de custus pigaiant finas su dinari de su stadu cun su redditu de citadinantzia e po custu indagaus fintzas cussus.
Po su trabagliu chi at fatu sa procura, cun is carabbineris in prima linea, una azienda de Francofonte, in sa provincia de Siracusa, portaiat a innantis is trabaglius insoru po mori de ses “caporalis”. A-i custus beniant donaus sacus cun aintru cosas de ponni paris, massimamenti centinaias de orrogus in prastica po is sistemas de infundidura de sa terra, e ddi beniat pediu de agatai in Francofonte genti chi ddu essi fatu po pagu dinari, chena peruna assiguratzioni, in domu e cun oras de trabagliu chi iant airi lassau stancus mortus is prus ominis prus fortis puru. Mancu de ndi chistionai de seguresa.
In is domus de is trabagliadoris in nieddu funt stetias agatadas atretzaduras, pinzas, cuadernus e agendinas aunia ddue funt assentaus, beni e cun passientzia manna, is oras de trabagliu. Po non de mancu de dexi oras a sa dì pigaiant de is centu a is duxentus eurus a su mesi. Assentaus fintzas is cunsignas de su materiali e is movimentus in imbucada e in bessida de cussus sacus chi non podiant passai chena essiri bistus de is carabbineris. Su cumpudu est stetiu fatu de is carabbineris de su “Nucleo Ispettorato” de su trabagliu de Siracusa, de su Cumandu provinciali e de atrus militaris chi funt lompius de is provincias de Catania, Messina, Enna e Ragusa e de chini s’ocupat de trabagliu in totu sa Sicilia.
Non c’at cosa peus de s’erricai fendu trabagliai sa genti aici, ma biviri in custu mundu est sempiri peus.
Màuru Mura
Cenarba, su 30 de Cabidanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://palermo.repubblica.it/cronaca/2016/11/19/news/lavoro_nero_in_sicilia_sommerso_da_sei_miliardi_300_mila_lavoratori_illegali-152325068/
