Po chini est pesau cun is figurinas de s’album Panini in is annus setanta e otanta, Vito Chimenti rapresentat totu cussu chi su fubalu fut e immoi no est prus. Brentiredda, mustazus, coscias prenas, pilus pagus, totu s’imbessi de cussu chi funt immoi is giogadoris de fubalu: prenus de musculus, tatuagius, pilus a s’urtima moda.
De eriseru custu giogadori spantosu non c’est prus. S’est intendiu mali in su spogliatoiu de de su campu de Pomarico, in sa provincia de Matera, a innantis de sa partida de su campionau de Eccellenza intru de Pomarico e Real Senise, chi poi non s’est giogada. Inderetura ant cicau de ddu sarvai is operadoris de su 118, ma non ce dd’ant fata.
Vito Chimenti teniat sessantanoi annus e est diventau famau, in su mundu de su fubalu, po una giogada chi tandu si biat feti in Sud America: sa “Bicicletta”: candu si ndi pesat sa bocia cun su carrancu in pissu de sa conca e si fuit a su difensori. Funt in pagus chi faiant cussa giogada e Chimenti s’arremonat massimamenti po cussu.
Vito Chimenti fut nasciu in Bari su 9 de mesi de Idas de su 1953, fintzas su fradi Franciscu fut giogadori, famau po essiri capitanu, in serie B, de sa Sambeneddetese, e fut tziu de Antoni, portieri chi in su tempus at giogau fintzas cun Roma e Juventus.
Vito at giogau cun su Matera, Lecco, Salernitana e Palermo, a innantis, e in segus est bessiu in Serie A cun is magligeddas de su Catanzaro, Pistoiese e Avellino: Is sa serie A at giogau po setantaseti bortas fendu trexi gol. Sa carriera de Chimenti est acabbada in serie C cun sa maglia de su Taranto.
Cumpangiu de scadra at tentu, in su Catanzaro, fintzas s’allenadori de su Casteddu Claudiu Ranieri chi at fueddau de sa morti de Chimenti: “Soi tristu meda po sa morti de Vito, is fueddus de Ranieri, fut un’omini onestu e sempiri leali. Ddu apu atobiau meda comenti de aversariu ma apu tentu sa bona sorti de ddue giogai paris in su Catanzaro. Su pensamentu miu andat a sa familia sua e a totu is parentis”.
Màuru Mura
Lunis, su trinta de gennargiu de su 2023
Foto: https://gazzettadelsud.it/articoli/sport/2023/01/29/malore-negli-spogliatoi-muore-ex-bomber-vito-chimenti-gioco-a-catanzaro-e-palermo-0c0196e0-f93e-4eb3-bf55-285518e339b7/
