Sa Sardigna e su Movimentu de is Steddaus godangiant una deputada. Funt uficialis immoi is cuatruxentus eigigiu in Montecitorio, de fatu chi s’uficiu centrali de sa Cassatzioni at torrau a contai is schedas de su proportzionali a s’acabbu de calculus de macus in pissu de is percentualis arregortas de is partidus e in pissu de is orrestus. Po is Steddaus ddu est sa sorpresa de una deputada in prus: Susanna Cherchi. Sa Steddada pariat sartada de fatu a un’atra conta de su Viminali, chi iat fatu andai a innantis s’eletzioni de Umberto Bossi, in su collegiu lombardu. De custu fatu totu andaiat acapiau unu a s’atru. Non beniat eligia in Lombardia Alissandra Todde, chi duncas imbucaiat in Parlamentu gratzias a is votus de is sardus propriu stupendudenci sa Cherchi.
Sa conta de sa Cassatzioni at invecias nau atra cosa: Todde s’at pigau sa cadira de sa Lombardia, fendu intrai su segiu finas po Susanna Cherchi.
Funt custus duncas is undixi deputaus sardus portaus a innantis de sa Sardigna: su centrudrestra portat in Montecitorio Dariu Giagoni de sa Lega, Sarbadori Deidda, Franciscu Mura, Barbara Polo, Giuanni Lampis totus de is Fradis d’Italia, Ugo Cappellacci cun Perdu Pittalis de Fortza Italia; su centrumanca Sirviu Lai de su Partidu Democratigu e Francisca Ghirra po is Birdis-Manca, chi at pigau sa cadira, chi in primas oras pariat segura, a Romina Mura.
Immoi conca bascia e trabbagliai, dognunu po cussu chi creit e po cussu chiant bofiu nai is eletoris. Forsis iat a tocai a stuciai inderetura una lei noa po non lompiri a cuasi unu mesi de is eletzionis po connosciri totu is nomins, ma parit ca si spassiant a si donai leis eletoralis sempiri prus dificili de cumprendiri. Chini pigat prus votus bessit in Montecitorio o in Palazzo Madama, dificili meda iat essi a fairi una lei de gosi?
Màuru Mura
Lunis, su dexi de Mesi de ladamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://it.wikipedia.org/wiki/Movimento_5_Stelle
