Non tocat a fairi girus de fueddus, est craru a totus comenti funt andadas is eletzionis regionalis in Lombardia e in su Latzio: at bintu su centrdrestra! Po custu po Giorgia Meloni, su Presidenti de su Consigliu italianu, at nau inderetura ca “giuat a s’atzioni de Guvernu”.

In Lombardia bincit Atiliu Fontana, chi duncas sighit a guvernai, cun su 54,67. Pierufranciscu Majorino, de su centrumanca si frimata a su 33,9% e Letitzia Moratti, de su Terzo Polo, pigat feti su 9,87%.

In su Latzio, invecias, at bintu Franciscu Rocca cun su 53,88%, sighit Alessiu D’Amato, candidau de su Partidu Democratigu e Terzo Polo cun su 33,5% e in segus sa candidada de is Steddaus, Donatella Bianchi, chi si frimat a su 10,7%.

Ma su numuru prus spantosu est sa pagu genti chi at votau, poita est feti su 40%. In Lombardia s’est presentau su 41,67% de chini ddu podiat fairi e in su Latzio su 37%. In Roma, a dolumannu, su 33,11%, est a nai unu dogna tres. Chi si castiant is eletzionis regionalis de su 2018 si cumprendit galu meglius: in Roma fut andau a votai su 63,11%.

In su centrudrestra, in ambas is regionis, is partidus ant tentu un’arresurtau bonu meda. Sa Lega de Salvini poderat, finas chi no est prus su primu partidu e at pigau su 17% de votus. Immoi sa fortza politica prus forti est Fradis d’Italia chi lompit a su 26%. Fortza Italia, su matessi poderat, finas chi est erribau a sa metadi de is votus chi iat pigau in su 2018, tandu fut su 14% e immoi s’8%, ma chi si pensat ca feti in urtimas politigas at pigau su 6,8%, tandu podeus cumprendiri ca at poderau.

Sa matessi cosa est sussedia in su Latzio, aunia Rocca e su centrudrestra ce dd’ant fata a nci stupai a Nigola Zingaretti, ca fut guvernadori de dex’annus. Fradis d’Italia pigat su 34%. Innoi, a dogna manera su Partidu Democratigu at poderau ca at pigau su 21%.

 

 

Màuru Mura

 

 

Martis, su catodixi de friargiu de su 2023

 

 

Foto: https://www.ansa.it/sito/notizie/politica/2023/02/13/elezioni-regionali-i-risultati-in-diretta.-lombardia-e-lazio-al-centrodestra.-fontana-rocca-oltre-il-50_025a1bc3-2af3-4490-81a7-73b8e029b0c0.html