Nisciuna arrasta né de sa varianti Delta e nemancu de sa noa, e chi fait timiri meda, varianti ingresa Xe e sa varianti Omicron 2 at giumpau sa Omicron 1 cun su 65% de nous impestaus a su Covid. Est custa sa relata in pissu de is studius de s’Azienda de su spidali de Casteddu.
“C’est feti calencunu casu chi assimbigliat a s’Omicron 1 – spiegat su diretori sanitariu de s’Aou Ferdinandu Coghe – po s’orrestu is impestaus de su Covid funt totus acapiaus a is duas variantis prus famadas. Seus, a dogna manera, galu aspetendu is arresurtaus de Casteddu e Tatari de s’Istitutu mannu de sanidadi: iant depiri coidai. Totu custas cicas ant a donai unu cuadru prus precisu de sa situatzioni in Sardigna”.
Fortza e lestresa de su impestamentu imoi funt frimaus de su vacinu: “Est a nai ca candu calencunu est postu mali, fians chi vacinau – sighit a nai Coghe – est statistica. A si vacinai est de importu mannu, finas poita c’at una diferentzia manna intru de su vacinu de dus e cussu de tres. Cussu de tres, est su meglius po binciri su Covid!”.
In custu tempus est de arriolu finas s’infrorentzia e in medas dda faddint po su Covid: “Est po cussu chi nosu consigliaus sempiri finas su vacinu contras s’infrorentzia po duas arregionis: sa de unu po non si dda pigai e sa de duas po agiudai is dotoris”, acabbat aici professor Coghe.
In su fratempus funt cuasi duamila is impestaus nous de su Covid-19 de is urtimas binticuatr’oras in Sardigna. Fatus in totu 11.051 tamponis e sa percentuali s’est abbasciada a su 18%.
Cuatru is mortus: duas feminas de otantacuatru e norantases annus, chi biviant in sa citadi metropolitana de Casteddu e dus ominis de setantaseti e norantun’annus, unu de sa provincia de su Sud Sardigna e s’atru de sa provincia de Tatari.
In is terapias intensivas funt in binticuatru e in is atrus aposentus in 323. In cuasi trintamila funt acorraus in domu.
7 de arbili de su 2022
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.my-personaltrainer.it/salute/variante-omicron-sars-cov-2.html
