Funt prus de tre mila is impestaus nous a su Coronavirus in Sardigna in is urtimas binticuatr’oras e si contant cuatru mortus finas. Su bulletinu regionali, donau de s’Unidadi de crisi de sa Regioni comenti dogna dì, chistionat de atrus 3.055 impestaus a su Covid-19 bogaus a foras de 8.684 tamonis molecolaris e antigenicus.
Is malaidus chi s’agatant in is terapias intensivas passant de noi a dexi, e in su mentris s’abbasciat su numuru de cussus chi funt in is atrus aposentus, de centucincuantaseti a centucincuantadus.
Incungiaus in domu funt in totu 38.664 e duncas custus puru crescint de 793.
Is mortus funt un’omini de norant’annus, chi biviat in sa provincia tataresa, una femina de norantacinc’annus de sa provincia de su Sud Sardigna e atras duas feminas de setantunu e setantaset’annus de sa provincia de Nugoro.
Invecias in totu Italia is impestaus nous funt 110.168 po cussu chi narat su Ministeru de sa Saludi. Sa dì a innantis furint 142.967. Is mortus si contant in su numuru de 106, chi calant de cussus de sa di a innantis chi furint 157. Sa percentuali est cuasi sa matessi cosa, passat de su 26% a su 26,8%.
Is tamponis fatus in totu Italia, intru molecolaris e antigenicus, funt stetius 410.435, cuasi centucorantamila de mancu de sa dì a innantis. In is terapias intensivas funt in 388, ca nd’at imbucau cincuantanoi nous e bessius atrus 13. In is atrus aposentus si ddue agatant 9.826.
Duncas in totu s’Italia po immoi is impestaus funt 1.391.890. chi funt 41.409 in prus cunfroma a s’atru bulletinu.
De su cumentzu de sa pesta, in su mesi de friargiu de su 2020, is ammalaidaus funt stetius 19.778.911 e is mortus 169.496. Is sanaus invecias funt 18.217.525.
Festas, atobius, non prus obrigu de mascheredda? Ant essi custus is arregionis de sempiri prus impestaus?
E ant a sighiri a cresciri?. Eus a benni a biri in is dis chi ant a lompiri.
14 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.puntosicuro.it/coronavirus-covid19-C-131/contagi-da-covid-19-le-criticita-AR-20578/