“Podeis andai orgogliosus de cussu chi eis fatu, de is arresurtaus chi eis tentu, de is progetus chi eis cumentzau e chi atrus ant a sciri cumpletai”. Cun custu fueddus Mariu Draghi at chistionau a is ministrus de su guvernu, torrendu gratzias po su trabbagliu fatu in cussu chi cun probabilidadi manna fut s’urtimu Consigliu de is ministrus.
“S’unidadi natzionali est, amaroglia, una esperientzia chi non si podit paragonai a peruna atra cosa, chi si tenit feti in is tempus de crisi manna. A dda tenni po tempus meda, comenti eis fatu, arrechedit maturidadi, cuscientzia de ita est su Stadu e passientzia manna puru. Is citadinus si aspetaiant medea de bosatrus e deu sciu ca dognunu de is ministrus at donau su massimu po ddus acuntentai”, at nau su presidenti Draghi.
At, in segus, arregodau totu cussu chi ant fatu e is emergentzias chi ddus ant fatu trabbagliai aici meda: “Eis cumbatiu cun sa pesta, cun una crisi economica, cun una crisi energetica, sa torrada de sa guerra in Europa. Eis aprontau su vacinu po totu is italianus, scritu e cumentzau su Pnrr, nau ca giai a unu numuru mannu de mesuras economicas. Fendu custu eis torrau a donai a s’Italia unu ruolu de importu mannu in Europa e in s’orrestu de su mundu”.
De fatu una pariga de fueddus in pissu a custu tempus de mudamentu, chi depit essiri chena cuntierras: “Tra calencuna cida in custas cadiras s’ant a setziri atrus ministrus e un’atru presidenti, chi funt cussus chi ant bintu is eletzionis de su 25 de cabudanni passau. Bosi cumbidu a donai una manu de agiudu po agiudai unu mudamentu chena certai, chi permitat a chini at a erribai de si ponni a trabbagliai inderetura. Ddu depeus a is Istitutzionis chi eus portau a innantis, ma, ddu depeus massimamenti a is citadinus. Is guvernus passant, s’Italia abarrat po sempiri chena farta”.
Màuru Mura
Martis s’undixi de Santu Aine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://it.wikipedia.org/wiki/Consiglio_dei_ministri_della_Repubblica_Italiana
