Dominigu su Casteddu, comenti totu sa Serie A, non calat in campu, ma in custas dis s’atentzioni manna de sa sociedadi, ghiada de su presidenti Giulini, e de totu is tifosus est po is comporas de giogadoris chi dpint agiudai sa scuadra a si sarvai. Po imoi funt erribaus dus difensoris, Goldaniga de su Sassuolo e Lovato de s’Atalanta, e unu giogadori de mesu campu, Baselli de su Torinu in sa dì de eriseru. De cust’urtimu Giulini at nau: Soi allirgu chi Baselli siat erribau, est unu giogadori chi fustis sighendu de tempus meda e at giai giogau cun Mazzarri po dus annus in su Torinu. De seguru est unu chi nos at agiudai de dominigu chi benit finas a s’acabbu de su campionau”.
In pissu de Nandez, su giogadori uruguaianu de su Casteddu, chi in medas atras scuadras, Juventus, Inter, Napoli e Torinu, iant a bolli, su presidenti at umperau custus fueddus: “Nandez? Est unu contu chi andat a innantis de paricius atobius de comporas de giogadoris. Imoi seus a una pariga de dis de s’acabbu de su mercau e po nosu est unu giogadori de importu mannu de averas. Nosi depeus sarvai e teneus abbisongiu de Nandez, ma su contu no est facili meda”. De is fueddus de Giulini, chi at chistionau cun is giorronalistas bessendudendi de s’atobiu in sa Lega de Serie A, si cumprendit ca s’uruguaianu, at abarrai in Sardigna, sonumancu finas a su mesi de làmpadas. “De totu su dinari chi eus spendiu de candu soi presidenti – at sighiu a nia Giulini – cussus po Nandez funt stetius de importu e iaus a bolli su matessi dinari chi eus spendiu. Ddu bolint in medas, ma nemus s’est acostiau po ddu pediri. Ligiu in is giorronalis chi nosi iant bolli a donai atrus giogadoris, ma a nosu non s’interessant”. A s’acabbu de sa ciaciarrada cun is giorronalistas Giulini ddu narat craru e tundu: “Dificili meda chi Nandez si nd’andit imoi a gennargiu”.
28 de gennargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://mobile.twitter.com/baselli
