S’atobiu faci a faci, in Astana, intru de Vladimir Putin cun Recep Tayyp Erdogan non fait allirgu chini s’aspetaiat unu cambiamentu in pissu de sa chistioni Ucraina, ma calencuna cosa po sa grandu crisi energetica chi investit totu su mundu est bessia a campu.
Chi s’Europa non bolit prus comporai diretamenti su gas russu, est su messagiu de su capu de su Cremlinu, ddu podit fairi cun s’ambasciada turca de Ankara, chi sighit a erriciri “su gas chi serbit”, poita s’est amostau “su Stadu prus affidabili”.
“Chi sa Turchia e is possibilis comporadoris in atrus Stadus funt interessaus, podeus pigai in cunsideratzioni su fraigamentu de un atru sistema de gasdoti e sa pensada de un hub de su gas in Turchia po ddu bendiri a atrus Stadus, massimamenti a cussus europeus”, at nau su “zar” in d’unu faci a faci, durau cuasi duas oras. “Custu hub, chi podeus fraigai paris, iat a serbiri de seguru non feti comenti de basi po sa bendiri, ma finas po pigai mesuras po is pretzius”, portendudeddus “a unu livellu de mercau normali chena peruna politicizatzioni”, at assegurau Putin, po sa cuntentesa de Erdogan.
Mosca, in su fratempus, sighit a mandai messagius de disponibilidadi a cale chi siat tratativa de pagi a s’Ucraina, ma non po custu si frimat cun is bombas. “S’operatzioni militari speciali sighit ma sa Russia est oberta a is fueddus po sighiri s’obietivu, ca de friargiu no est mai cambiau” at spiegau su Cremlinu, aciungendu a dogna manera de non s’apetai peruna mesa de acordiu. Chi, in segus, c’at essi calencunu signali de is Usa, at essi pronta a ddus pigai in cunsideru, at sempri nau su ministru de is Esterus Serghei Lavrov, chistionendu de unu faci a faci intru de Putin cun Joe Biden in su G20 de su mesi ch’intrat in Bali.
Kiev non si fidat. Sa Russia “andat posta a un’ala cun sa diplomatzia ca est unu strumentu potenti meda, ma non ci podit essiri finas a candu a fueddai funt is armas”, at avertiu Volodymyr Zelenksy, chi sighit a s’aspetai armas etotu de s’Europa. “Nos aspetaus passus de importu de s’Italia e de sa Francia. Sonumancu su 10% chi nosi serbint po nosi difendiri”.
Màuru Mura
Martis, su 18 de Mesi de talamini de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.internazionale.it/notizie/2022/10/13/putin-erdogan-astana-buone-relazioni
