S’acordiu intru de Letta cun Calenda ponit unu pagu de ordini po comenti dividiri is ses collegius feti a unu nomini (4 po sa Camera e 2 po su Senau) fintzas in Sardigna.

Mancant, prus o mancu, binti dis po connosciri is nominis chi ant a curriri po is eletzionis politigas de su 25 de cabidanni e is partidus depint trabagliai po agatai is candidaus po is 16 postus chi ddi spetant (11 in sa Camera e 5 in su Senau). Funt noi de mancu de cussus chi si ddue agatant imoi, duncas sa bataglia po is postus segurus at essi una gherra. Ddu est una cosa chi podit mudai is numurus: Marco Meloni, coordinadori de sa segreteria natzionali de su Pd iat podiri essiri candidau in Sardigna comenti primu nomini in sa Camera o in su Senau. In sa pensada de unu iat depiri fairi unu brinchidu a coa Baingiu Manca, e segunda in sa lista at essi sempiri, a dogna manera, Romina Mura. Chi Meloni benit candidau a su Senau, su matessi de Manca ddu depit fairi Sirviu Lai, chi est unu de is nominis tentus in grandu contu. Ci podit essiri finas sa possibilidadi chi Meloni siat candidau foras Sardigna e tandu totu iat abarrai aici comenti parit.

In is atrus partidus parit invecias cosa prus facili po is nominis. Sa Lega iat depiri ponniri su consiglieri regionali Dariu Giagoni a sa Camera e Carrulu Doria, de su Psd’Az in su Senau, Fortza Italia de seguru at a tenni su coordinadori regionali Ugo Cappellacci in sa Camera, Fradis de Italia at a torrai a ponni Sarbadori Deidda in sa Camera e forsis sa coordinadora Antonedda Zedda in su Senau. Is Steddaus  Alisandra Todde primu nomini in sa Camera e Etore Licheri in su Senau.

In pissu de is nominis chi s’at a batagliai in is collegius cussa prus interesanti podit essiri in Casteddu Citadi Metropolitana po sa Camera aunia iat a podiri curriri sa numuru dus de sa Regioni Alisandra Zedda e su sindigu beciu de CAsteddu Massimeddu Zedda o Andria Frailis.

 

 

 

Màuru Mura

 

 

 

3 de austu de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.difesa.it/Il_Ministro/Uffici_diretta_collaborazione/UfficioRapportiConIlParlamento/Pagine/default.aspx