Po su Ministeru de sa Saludi funt 64.861 is impestaus nous de su Covid in is urtimas binticuatru oras, sa dì a innantis furint 18.813. Is mortus funt centunoranta, crescius cunfroma a is centubintunu de sa di prima.
Crescit, finas chi de pagu, sa percentuali intru de tamponis e impestaus: de su 17,8% a su 18,3%. In totu, tra molecolaris e antigenicus, si funt fatus 354.431 tamponis. In is terapias intensivas, sempiri chistionendu de totu s’Italia, si ddue agatant in 386, doxi de mancu de sa dì a innantis, ma trintotu nous ddue nd’at imbucau. Is ricoveraus in is atrus aposentus funt calendu: ndi funt bessius in 282 e nd’abarrant in 10.245.
Invecias po cussu chi pertocat sa Sardigna is impestaus nous funt 1.873, de custus 1.774 benius a foras de su tamponi antigenicu. In totu is tamponis fatus, intru de molecolaris e antigenicus, funt stetius 7.782.
A ponni in pensamentu funt prus che a totu is mortus: undixi! Ant lassau sa vida duas feminas de cincuantatres e sessantatres annus chi biviant in sa provincia de su Sud Sardigna; una femina de norant’annus e dus ominis de setantacuatru e norantacuatr’annus, chi biviant in sa provincia de Nugoro; una femina de norant’annus e cinc’ominis de setantases annus, dus de otantacincu unu de otanatases e s’atru de otantaseti, chi biviant in sa provincia de Tatari.
Unu in prus imbucat in sa terapia intensiva, immoi funt cuindixi e dus in prus imbucant in is atrus aposentus: immoi funt centusetantadus.
Ndi bessint de s’incungiamentu in domu in 1.471 e ddue abarrant in 31.709.
Una cosa nosi est benia a conca: certu ca chi su Covid boliat ponni in prova sa passientzia de s’omini giai ce dd’at fata: dus annus de mesu chi seus cumbatendu e su prus de sa genti at sighiu totu cussu chi ddi beniat nau de dotoris e scentziaus chena si ponni perunu problema.
Màuru Mura
3 de austu de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.inail.it/cs/internet/comunicazione/covid19-misure-dell-istituto.html
