Is fortzas specialis messicanas ant acapiau Audias Flores Silva, lamau de totus “El Jardinero”, capu regionali de su “Cartel de Jalisco Nueva Generacion, chi cuasi totus creint comenti cussu chi at pigau su postu de Nemesio Oseguera Cervantes, tzerriau “El Mencho”, acapiau in is mesis passaus.
Is Stadus Unidus, po s’capiu de su “boss”, iant postu a curriri giai cincu milionis de dollarus. Po cantu pertocat is autoridadis de politzia, “El Jardinero”, controllaiat laboratorius de metanfetaminas e su caminu chi faiat sa droga intru s’America de mesania, su Messicu e is Stadus Unidus. Audias Flores Silva tenit arreiginis de su Michoocàn e si sciat beni ca fut un’omini de su cali “El Mencho” si fidaiat a sa tzurpa: su trabbagliu ddu faiat in regionis diversas, intru de is calis Jalisco e Zacatecas. Sempiri po sa lei “El Jardinero” tenit sa curpa de traficu internatzionali de cocaina et eroina e de umperu de armas.
S’acapiu de Silva est unu dorpu mannu po sa banda messicana, ma no est ancora stetiu acrariu chi sa catura si depat a su trabbagliu de is servitzius segretus de is Stadus unidus o chi calencunu de s’organizatzioni criminali ddu apat traigiu, poita funt in medas a bolli pigai su postu de cumandu de “El Mencho”.
Po s’espertu de seguresa natzionali David Saucedo, su contu presentat is matessis particolaridadis de is atzionis pigadas contras de sa “Banda de Sinaloa”, chi si funt tentas a pustis de s’acapiu, in su mesi de orgiolas de su 2014, de Ismael “El Mayo” Zambada candu est cumentzada una guerra intru de is “Los Chapitos” (est a nai una parti de sa “Banda de Sinaloa” chi si preniat de is figlius de “El Chapo” Guzman) contras de “La Mayza” (atra potenti parti de sa “Banda de Sinaloa” fidelis a sa familia de El Mayo Zambada Garcia, chi nde dda iat pesada cun su matessi El Chapo) chi iat portau a su cumpartzimentu de s’organizatzioni.
