Andria Biancareddu – consiglieri regionali e assessori a s’Istrutzioni in sa Giunta ghiada de Christian Solinas – arregollit s’eredidadi de Giorgio Oppi, mortu sa cida passada in su spidali Brotzu, comenti de “leader” de s’Udc in Sardigna.

Sa nomina a coordinadori regionali de su partidu est lompia eris de su segretariu natzionali italianu Larentu Cesa.

“Est una manera de donai continuidadi a su trabagliu fatu de Giorgiio Oppi chi, a intru de una pariga de dis at essi arregodau in Roma cun d’una missa gratzias a sa diretzioni de su partidu”, fait sciri unu documentu de su partidu. In is dis benidoras, galu, “ant essi fatus is nominis de unu coordinamentu regionali prus mannu chi at andai a coberri totu is provincias de sa Sardigna e at essi a su costau de Biancareddu po ddu agiudai a ndi pesai su partidu in totu su territoriu sardu”.

Is listas e s’organizatzioni de sa campagna eletorali po is politicas de su binticincu de cabudanni, ma finas sa verifica de Giunta, annuntziada de Christain Solinas in su mesi de martzu e po immoi posta a un’ala, funt is chistionis prus de importu mannu chi Biancareddu tenit de fairi.

No at spantau a nemus su nomini de Biancareddu ca de sempiri fut a su costau de Oppi e pariat unu de is prus abatius candu at scipiu de sa morti.

Biancareddu est nasciu in Tatari su 23 de gennargiu de su 1966, est laureau in Leis e fait, duncas, s’abogau comenti de professioni. At cumentzau a fairi su consiglieri regionali de su 19 de martzu de su 2009 e at tentu incarrigus meda in sa XIV legisladura:

Componenti de sa Giunta de is eletzionis, Cuestori de su Consigliu Regionali, Segretariu de su Consigliu Regionali, Assessori de s’Ambienti, tra is atrus.

In totu at fatu parti de cuatru legisladuras a livellu regionali sempiri cun incarrigus chi at tentu e onorau cun sabidoria.

 

 

 

Màuru Mura

 

 

2 de austu de su 2022

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

 

Foto: https://m.facebook.com/andreabiancareddu