In Italia, po su bulletinu de su Ministeru de sa Sanidadi, funt 47.763 is impestaus nous de su Covid-19, in is urtimas binticuatr’oras. Sessantanoi is mortus. Sa percentuali de is positivus est, prus o mancu, oguali a sa dì a innantis: 19,5 contras 19,8. Is tamponis molecolaris e antigenicus fatus funt stetius 244.746 contras is 333.204 de a innantis.
Est de cuasi tres annus chi seus a intru de custa pesta chi non si ndi bolit propriu andai, bastat a pensai ca de su friargiu de su 2020 in Italia si funt amalaidaus de coronavirus in 22.944.496.
In is terapias intensivas s’agatant in 228 e in su bilanciu tra intradas e bessidas (eris funt 224) chi bolint nai cuatru de mancu, in su mentris nd’at imbucau atrus coranta. Is ricoveraus in is atrus aposentus funt 6.484, eris funt 6.259, chi bolit nai ca nd’at imbucau 225 in prus. Cussus chi funt impestaus immoi funt 533.451. Dimitius e sanaus funt bessius a 22.233.326, e is mortus in totu, de cussu friargiu famau de su 2020, funt lompius a 177.719.
In su fratempus in Sardigna, po cussu chi narat su bulletinu regionali de s’Unidadi de crisi, funt 750 is impestaus nous, de custus 658 cun su tamponi antigenicu. Cun 3.356 tamponis molecolaris e antigenicus fatus, sa percentuali de positividadi est de su 22,3%, unumuru chi s’abbasciat cunfroma a su 24,4% de sa dì a innantis. S’Isula prangit un’atru mortu, un’omini de norant’annus chi biviat in s’oristanesu. Calant de numuru cussus chi s’agatant in terapia intensiva, de cincu a tres e bessint de norantases a norantotu is ricoveraus in is atrus aposentus. Is sardus impestaus de su virus chi s’agatant incungiaus in domu, invecias, funt 6.487; 258 in prus in is urtimas binticuatr’oras.
Po chini s’aspetaiat numurus prus bellus est unu dolu, ma a pagu a pagu giai ndi besseus a foras e po chini passillat in is caminus parit ca su coronavirus est giai bintu, ma aici no est. Atentzioni, atentzioni e galu atentzioni.
Màuru Mura
Cenarba su 14 de Santu Gaine de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.efsa.europa.eu/it/news/coronavirus-no-evidence-food-source-or-transmission-route
