Est cumentzau, eris a merì, su Festival de Sanremo. Seus lompius a setantres. A ddu ghiai sempiri Amadeus, acumpangiau ocannu de Giuanni Morandi e po sa primu dì de Chiara Ferragni, po sa borta de unu in televisioni.
A pustis unu minutu aunia totu funt abarraus citius po arremonai is mortus de su terromotu intru de Turchia e Siria, totus ant batiu is manus a su presidenti de sa Republica, Sergiu Mattarella. Mai si fut amostau unu presidenti in s’Ariston de Sanremo. In segus Giuanni Morandi, in onori de Mattarella, at cantau s’Innu de Mameli, paris a totu su publicu.
Su fueddu, a pustis, est passau a Robertu Benigni, chi at chistionau, comenti scit fairi beni, de sa “Costitutzioni italiana, sa prus bella de su mundu”, chi ocannu lompit is setantacincu annus.At arremonau is babus mannus de sa Costitutzioni e at chistionau de s’articolo undixi, cussu chi narat ca “s’Italia est sempiri contras de sa gherra” e dapoi s’articolo bintunu, chi difendit sa libertadi de chistionai. Po Benigni est sa borta de ses chi bessit subra su calcu de Sanremo.
Intru de is ospitis de sa primu dì Mahmood cun Blanco, chi ocannu passau ant bintu, Salmo e is Pooh, chi ant cantau duas de is canzonis prus famadas: Pensiero e Piccola Katy. Forsis funt cussus prus agradessius de sa genti chi ddis at batiu is manus a forti.
In gara eris catodixi cantantis: Anna Oxa (Sali sa cantzoni sua), Gianmaria (Mostro), Mr. Rain (Supereroi), Marcu Mengoni (Due vite), Ariete (Mare di guai), Ultimo (Alba), Coma Cose (L’addio), Elodie (Due), Leo Gassman (Terzo cuore), Cugini di Campagna (Lettera 22), Giuanniluca Grignani (Quando ti manca il fiato), Olly (Polvere), Colla zio (Non mi va), Mara Sattei (Duemilaminuti).
Oi sa dì de duas e Sanremo nos at a acumpangiai fintzas a sabudu chi benit, candu eus a connosciri chini at essi su campioni.
Màuru Mura
Mercuris, s’otu de friargiu de su 2023
Foto: https://www.open.online/temi/festival-di-sanremo/
