A pustis de dus annus de pesta e centucincuantamila mortus po mori de su Covid, s’Italia cumentzat a biri, giai fut ora, su torrai a sa vida chi si faiat a innantis. Dognunu de nosu giai scit ca no at essi acici de averas, ma tocat finas a ci creiri, feti po agiudai conca e coru.
A partire de oi si frimat s’obrigu de umperai sa mascherina in logu obertu, finas chi abarrat necesariu a dda tenni sempiri in buciaca e a dda ponni in cara chi sa genti est meda.
Si torrant a oberri is discotecas e chini tenit gana de sartai in pista ddu podit fairi chena mascherina. Cussu de is discotecas est, forsis, su mundu chi at sunfriu de prus, ca de dus annus a custa parti ant obertu feti unu pagu de tempus in s’istadi de su 2020.
Cussa de oi est feti sa parti de unu de unu caminu chi finas a s’acabu de martzu, candu non c’at essi prus s’emergentzia, at a betiri non feti obrigus, comenti fustis abituas a fairi finas a imoi. Finas po su Green pass at essi totu mudau, su 15 de lampadas po cussus prus mannus de cincuant’annus acabat s’obrigu de vacinu.
Su 31 de martzu at essi finas sa dì, galu no est seguru ma si ndi chistionat, chi podeus saludai is mascherinas in logu serrau.
Si cumentzat a chistionai finas de ci bogai a un’ala s’obrigu de su green pass a innantis de su 31 de martzu po totu cussas atividadis aunia serbit in logus obertus, comenti ristorantis o stadius.
Atra nova de importu mannu, torrendu gratzias a Italia Viva chi ddu at fatu ponni in su decretu de Paschigedda, est ca, de su 10 de martzu chi benit, s’at a podiri rendiri bisita a is malaidus in is spidalis po tres cuartu de ora a sa dì. E sempiri in su mesi ch’intrat, de su primu, is stadius e is atrus logus aunia si fait sport, si podint preniri po tres cuartus. “Creu chi po sa fini de su campionau s’ant a podiri preniri in totu”, at nau su numuru dus de su ministeru de sa Saludi Andria Costa.

 

11 friargiu de su 2022

 

Màuru Mura

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.rainews.it/articoli/2022/02/covid-da-venerd-stop-alle-mascherine-allaperto-ad-aprile-anche-al-chiuso-83bb6bc0-9b02-4fd0-893e-e6c8a94adf60.html