“Scagliadeddus in s’acidu”, “feideddi fairi s’acabu de Cucchi”: funt is fueddus de una chat, non pubrica, aunia calencunu carabineri si dda pigant cun Gabriele Natale Hjorth e Finnegan Lee Elder, is dus piciocus de is Stadus Unidus incurpaus e cundennaus, in su processu de unu, po airi bociu su carabineri Mariu Cerciello Rega.
Est un’atra parti de su contu, de custu bocidorgiu chi meda iat fzatu chistionai. Imoi custus fueddus scritus funt intraus in sa documentatzioni chi is abogaus presentat a is giuigis. Giai unu de is carabineris chi iant tapau is ogus a Natale Hjorth est a suta processu cun sa curpa de airi fatu cosas chi andant contras is leis de su Stadu.
Inchietus meda is capus de is carabineris chi ant pigau pinna e paperi scriendu ca: “Candu is nominis de cussus chi ant scritu custus sciollorius funt crarus – si ligit – cumentzuas un’indagu inderetura po biri eita podeus fairi”.
Fueddus arrabiosus cussus chi si ligint in sa chat, candu is carabineris iant acapiau is dus americanus in Roma su 26 de triulas de su 2019. “Ddus eus tentu, seus erribendu”, scriat unu de is carabineris e is atrus chi naraiant: “Boceideddus a cropus”, “Spereus chi ddi facant fairi s’acabu de Cucchi”.
Intru de is fueddus chi imoi funt acabaus in is manus de su giuigi finas cussa de unu militari chi scriat: “Non bengiais a mi nai de ddus acapiai e bastat. Depint essiri scutus. Tocat a ddus serrai in d’unu aposentu e a ddus bociri deaveras”, e atrus serraiant nenduru “de ddus scagliai in s’acidu”.
Si podit finas cumprendiri su dolu de is carabineris, ca non depit essiri bellu a biri unu collega mortu, ma in d’una democratzia funt fueddus chi non si depint umperai. Dognunu, calechisiat curpa tengiat, tenit abbisongiu de diritus, chena torrai a tempus aunia sa giustissia si faiat de sei. A tenni una divisa in pissu non ti donat diritu de scudiri a nemus.
10 de friargiu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://tecnologia.libero.it/pericolo-whatsapp-gli-hacker-possono-inviare-i-virus-tramite-le-chat-13747
