Su presidenti britannicu beciu Boris Johnson at decidiu de non curriri, comenti “leader” de sa magiorantzia Tory, po pigai su postu de Liz Truss chi s’est dimitiaa pustis una pariga de mesis de guvernu. Cun custa decisioni Johnson at obertu su caminu po Rishi Sunak, carantadus annus, omini cun ambitzionis mannas cancellieri beciu de su “Scacchiere” e bistu beni meda de is mercaus, e, massimamenti, postu de su Partidu de is Conservadoris comenti de capu in magiorantzia po Westminster. Prus a prestu, a pustis is dimissionis formalis de Liz Truss, in is manus de Carrulu III, at essi automaticamenti eligiu premier britannicu de su Rei.
Est agradessiu a sa City, Sunak, chi aici at essi su primu capu de guvernu de su Regnu cun craras originis indianas. Penny Mordaunt, sa sola chiddi podiat ponni is bestonis intru is orrodas, in segus a sa rinuncia de Boris Johnson, s’est arretirada cussa puru.
Brexiteer cuncretu cun esperientzias in su mundu de sa finantzia in sa City e in is Stadus Unidus e pobiddu erricu de sa miliardaria indiana Akshata Murty, podiat contai non de mancu de centucincuanta deputaus, de is 357 de sa truma de is Tory, pigaus de s’ultradrestra chi bolit sa Brexit e de is prus moderaus puru. Invecias Mordaunt, a innanti de sa bessida de Johnson, ndi teniat giustu una trintina, meda atesu de sa cuota de centu.
Su sindigu beciu de Londra, chi si fut dimitiu feti una pariga de cidas a immoi po una meca de scimprorius comenti su Partygate, at sustenniu de airi cunvintu prus de is centu deputaus chi serbint, ma non ce dd’at fata a cunvinciri Sunak e Penny Mordaunt a si ponni a is palas suas. Duncas at amitiu e cumprendiu de non podiri torrai a ghiai su guvernu chena un’agiudu prus mannu de sa truma parlamentari de magiorantzia. Epuru, at aciuntu “po is sondagius fui postu beni meda po torrai a binciri is eletzionis de su 2024”.
Màuru Mura
Martis, su 25 de Santu Aine de su 2022
Foto: https://www.affaritaliani.it/esteri/sunak-nuovo-premier-822068.html
